Jeneva qalasyndaǵy Dúniejúzilik saýda uiymy Bas keńesiniń otyrysynda Qyrǵyz Respýblikasynyń ótinishi boiynsha qazaq-qyrǵyz shekarasyndaǵy jaǵdai talqylandy. Bul jaiynda QR Saýda jáne integratsiia ministrliginen málim etti, dep habarlaidy "Ult aqparat".
Qyrǵyz Respýblikasynyń ókilderi Qazaqstan Respýblikasynyń DSU kelisimderiniń keibir erejelerin buzǵandyǵy týraly narazylyqtaryn bildirgen. Olardyń atap ótýinshe, bul Qyrǵyzstannyń ekonomikalyq kórsetkishteriniń nasharlaýyna alyp kelgen.
Al Qazaqstannyń BUU janyndaǵy jáne basqa da halyqaralyq uiymdardyń Jenevadaǵy turaqty ókili Janar Aitjanova Qyrǵyzstannyń shaǵymyn negizsiz dep atady.
Ol Qyrǵyz tarapyna Eýraziialyq ekonomikalyq odaq týraly shartqa sáikes, EAEO-ǵa múshe memleketterdiń aýmaqtary arasynda kedendik deklaratsiialaý men memlekettik baqylaýdy, sonyń ishinde kedendik, kóliktik, veterinarlyq jáne sanitarlyq baqylaýdy qoldanbastan taýarlardy erkin ótkizý júzege asyrylatynyn eske saldy.
Demek, Qyrǵyz Respýblikasynan Qazaqstanǵa keletin, onyń ishinde Qazaqstan aýmaǵy arqyly tranzitpen ótetin barlyq taýarlar kedendik baqylaý talaptarynan bosatylǵan. Osyǵan bailanysty Qyrǵyz Respýblikasy kótergen máseleler tek qana EAEO zańnamasynyń quqyq qoldaný praktikasymen bailanysty jáne osy uiymnyń alańynda talqylanýy tiis.
Elshi Aitjanova sondai-aq Dúniejúzilik saýda uiymyna múshe memleketterdiń nazaryn kedendik ákimshilendirýdiń álsizdigine bailanysty Qyrǵyzstandaǵy júielik problemalarǵa, bul óz kezeginde EAEO múshe memleketterine jalpy biýdjetinde kedendik baj túsimderiniń tolyq alynbaýyna aýdardy.
«2019 jyldyń ózinde Qyrǵyzstannan Qazaqstan Respýblikasynyń jalǵan rezidentterine taýar ákelýdiń 2,6 myńnan astam oqiǵasy anyqtaldy. Sondai-aq, Resei Federatsiiasynyń aýmaǵyna qyrǵyz taýarlaryn «jalǵan tranzitti» júzege asyrýdyń 4,8 myńnan astam oqiǵasy anyqtaldy. Olar fakti boiynsha ulttyq biýdjetke janama salyqtardy (QQS) tólemei Qazaqstan naryǵynda satyldy», - dep atap ótti Elshi.
Qazaqstan qabyldaǵan sharalar salyqtyq ákimshilendirýdi jáne el biýdjetine QQS túsimderiniń tolyqtyǵyn qamtamasyz etýge baǵyttalǵan. Sonymen qatar, bul sharalar ishki júk tasymaldaýshylarǵa, EAEO múshe memleketteriniń jáne úshinshi elderdiń júk tasymaldaýshylaryna bir qatarly qoldanylady.
Qorytyndylai kele, Qazaqstan elshisi Qyrǵyz Respýblikasyn DSU men EAEO-ǵa kirý kezinde alǵan mindettemelerin tolyq oryndaýǵa, sondai-aq óz seriktesteriniń ulttyq zańnamalaryn saqtaýǵa shaqyrdy.
Qazaqstandyq tarap, eger qyrǵyz tarapy sot isin bastasa, DSU alańyndaǵy sot protsesi aiasynda óziniń múddeleri men quqyqtyq sharalaryn qorǵaýǵa daiyn.
