©AP/Vladimir VORONIN
Bishkek qalasynyń Pervomai aýdandyq soty Qyrǵyzstannyń burynǵy prezidenti Almazbek Atambaevtyń shetelde emdelýine ruqsat bergen. Bul týraly Azatyqtyń Qyrǵyz redaktsiiasy habarlady.
Atambaevty túzetý lagerinen bosatqanyn Qyrǵyzstannyń sotsial-demokrattar partiiasynyń tóraǵasy Temirlan Sultanbekov rastady. Onyń sózinshe, "burynǵy prezidentke ómirlik mańyzy bar eki operatsiia jasalýy kerek, odan keiin ol emdeý-saýyqtyrý kýrsynan ótýge tiis".
13 aqpanda Qyrǵyzstan Joǵarǵy sotynyń sot alqasy jabyq otyrys ótkizip, Almazbek Atambaev isin qaita qaraýǵa jiberý jóninde sheshim qabyldaǵan.
Sot alqasynyń qaýlysynda burynǵy prezident advokattarynyń "jańadan málim bolǵan jaǵdailarǵa bailanysty qylmystyq isti qaita qaraý týraly" usynysy qanaǵattandyrylǵany aitylǵan.
Sot alqasy Atambaev jóninde Joǵarǵy sottyń 2021 jylǵy 12 qazanda jáne 2022 jylǵy 15 naýryzda qabyldanǵan qaýlylarynyń kúshin joiǵan.
Aita keteiik, byltyr maýsym aiynda Bishkek soty Almazbek Atambaev pen 2020 jylǵy qazandaǵy jappai tártipsizdikter boiynsha jaýapqa tartylǵan ózge de adamdar isinde "qylmystyq áreket joq" dep, olardy aqtaǵan. Atambaev sot protsesin "tsirkke" teńep, oǵan ári qarai qatysýdan bas tartqan, "sońǵy sózdi bostandyqqa shyqqan soń aitatynyn" málimdegen.
Qyrǵyzstannyń burynǵy prezidenti qylmystyq álemde tanymal "Áziz Batýkaevty túrmeden zańsyz bosatty" degen aiyppen qamaýǵa alynǵan. 2020 jylǵy 23 maýsymda 11 jylǵa sottalyp, múlki tárkilengen.
2020 jyly 5 qazanda parlament sailaýynyń nátijesi jariialanǵan soń jappai miting bastalyp, sońy dúrbeleńge ulasqan. Narazylar Qyrǵyzstan parlamenti men prezidentiniń ǵimaratyn basyp alǵan soń ulttyq qaýipsizdik komiteti memlekettik tergeý komitetiniń ǵimaratyna bettegen. Komitet tóraǵasymen kelissózden keiin Atambaev bosatylǵan. Ol birneshe kún ótken soń qaita tutqyndaldy.
Almazbek Atambaev 2011-2017 jyldar aralyǵynda Qyrǵyzstan prezidenti boldy. 2019 jyly Qyrǵyzstan parlamenti ony "burynǵy prezident" mártebesinen aiyrǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
