Qyrǵyzstannyń ulttyq qaýipsizdik jónindegi memlekettik komiteti "Qumtór" altyn kenindegi jemqorlyqqa qatysty qylmystyq is aiasynda burynǵy birinshi vitse-premer Taiyrbek Sarpashevti ustady.
Komitettiń baspasóz ortalyǵynyń habarlaýynsha, kúdikti "kanadalyq Centerra Gold Inc. kompaniiasy men eldiń joǵary laýazym ieleri bailanys ornatyp, "Qumtór" kenishindegi muzdyqtardyń qaýipsizdigine nuqsan keltire otyryp, kanadalyq kompaniia múddesi úshin qylmystyq áreketke barǵan".
Arnaiy qyzmet málimetine qaraǵanda, "qyrǵyz úkimetinde jaýapty qyzmet atqarǵan Taiyrbek Sarpashev Centerra Gold Inc. kompaniiasynyń múddesi úshin "Muzdyqtar týraly" zań jobasynyń qabyldanýyna kedergi jasaǵan". "Buǵan qosa, ol "Qumtór Gold Kompanige" "Qumtór" kenindegi muzdyqtardy paidalanýǵa múmkindik beretin Sý kodeksine tolyqtyrý engizip, ony parlamentke usynǵan, sol arqyly Lysyi jáne Davydov muzdyqtarynyń buzylýyna jol bergen" dep habarlady memlekettik komitet.
Arnaiy qyzmet burynǵy sheneýnikti 17 maýsymda ustady. Sarpashev jemqorlyq jasady degen kúdikke ilikti. Ony tergeý kezinde qamaýda ustaý-ustamaý máselesin Bishkektiń 1-mai aýdandyq soty qaraidy.
Munyń aldynda "Qumtór" isi aiasynda birneshe burynǵy sheneýnik, qazirgi jáne burynǵy depýtattar ustalǵan. Arnaiy qyzmet tergeýge shaqyrǵan birneshe adamdy bostandyqqa jibergen.
Áýeli burynǵy premer-ministr Ómirbek Babanov ustaldy, odan soń Jogorký Keneshtiń qazirgi depýtattary Asylbek Jeenbekov pen Torobai Zýlpýkarov, sonymen birge eks-depýtattar Ishak Pirmatov, Talantbek Ýzakbaev jáne Almazbek Baatyrbekov qamaýǵa alyndy. Buǵan qosa, prezident apparatynyń burynǵy basshysy Daniiar Narymbaev ustaldy, al Jogorký Keneshtiń úkimettegi burynǵy quzyretti ókili Dinara Moldosheva eshqaida ketpeý týraly qolhatpen bosatyldy.
Keiin Talantbek Ýzakbaev pen Almazbek Baatyrbekov 31 shildege deiin úiqamaqqa aýystyryldy.
Qylmystyq is aiasynda burynǵy premer-ministrler Temir Sariev pen Igor Chýdinov, eks-depýtat Maksat Sabirov jáne depýtat Ryskeldi Mombekov tergeldi. Olar tergeý qupiiasyn buzbaý maqsatynda qandai saýaldar qoiylǵanyn aitpady.
