Memlekettik kirister komiteti 1 sáýirde jalǵan ilespe qujattarmen halyq tutynatyn taýarlardyń (kiim, aiaq kiim, kosmetika, ydys jáne t.b.) iri partiiasyn Qazaqstanǵa ákelý áreketiniń joly kesti, dep habarlaidy "Ult aqparat" Qarjy ministrliginiń baspasóz qyzmetine silteme jasap.
"Qyrǵyz Respýblikasynan kele jatqan 6 júk kóligine qatysty taqyryptyq-salyqtyq tekserý júrgizý barysynda qujattarda Qazaqstan Respýblikasynyń alýshysy retinde kórsetilgen kompaniianyń atalǵan taýarlardyń importyna eshqandai qatysy joq ekendigi anyqtaldy.
Júrgizilgen tekserý aiasynda kompaniia basshysy importqa qatysy joqtyǵy týraly málimdeme jasady, osyǵan bailanysty atalǵan is boiynsha materialdar taýarlardy memleket kirisine ainaldyrý maqsatynda sotqa jiberiletin bolady" - delingen habarlamada.
Memlekettik kirister komitetiniń habarlaýynsha, importqa qatysy joq tulǵalardyń atyna taýarlardy ákelý áreketi importqa qosymsha qun salyǵyn tóleýden jaltarý úshin qoldanylady.
Qyrǵyz Respýblikasymen ózara saýdada kóleńkeli taýar ainalymyn qysqartý maqsatynda birqatar jumys kezdesýleri ótkizildi. Bul másele 2022 jylyǵy 15-16 aqpanda Almaty qalasynda ótken Qazaqstan Respýblikasy men Qyrǵyz Respýblikasynyń saýda-ekonomikalyq yntymaqtastyǵy jónindegi jumys tobynyń otyrysy barysynda da qaraldy.
Onyń nátijeleri boiynsha Qyrǵyz Respýblikasynyń Qarjy ministrligi janyndaǵy Memlekettik salyq qyzmeti 16 aqpannan bastap eksporttaýshylarda EAEO elderine eksporttaý kezinde tasymaldanatyn taýarǵa elektrondyq shot-faktýralardyń (EShF) bolýyn qamtamasyz etý jónindegi mindettemelerdi ózine aldy.
Degenmen, EShF-syz taýarlardy ótkizý faktileri jalǵasýda.
Mysaly, tek 27-31 naýryz aralyǵynda qytai óndirisiniń halyq tutynatyn taýarlaryn tasymaldaǵan 345 júk mashinasynyń 268-i (78%) EShF-syz jóneltilgen. Qalǵan jaǵdailarda EShF barlyq taýarǵa rásimdelmegen.
«Memlekettik kirister komiteti júrgizgen Qyrǵyz Respýblikasynan kele jatqan júk avtokólik quraldaryna qatysty tekserýler Qazaqstan Respýblikasy men Qyrǵyz Respýblikasynyń saýda-ekonomikalyq yntymaqtastyǵy jónindegi jumys tobynyń otyrysy barysynda qol jetkizilgen ýaǵdalastyqtarǵa sáikes keletinin atap ótken jón, olarǵa sáikes taqyryptyq salyqtyq tekserýler tasymaldanatyn taýarǵa EShF bolmaǵan kezde júrgiziledi», - delingen habarlamada.
