Foto: gov.kz
Ulttyq qaýipsizdik komiteti tóraǵasynyń orynbasary - Shekara qyzmetiniń basshysy Erlan Aldajumanov Qyrǵyzstanmen aradaǵy shekarany kúzetý sharalary kúsheitilip jatqanyn málimdedi, dep habarlaidy Sputnik Qazaqstan.
Qazirgi kezde osy baǵytta shekarany kúzetý sharalaryn kúsheitýdiń naqty sebepteri bar.
“Shekaradaǵy zańbuzýshylar, kontrabanda jáne taǵy basqa máselelerge bailanysty qyrǵyz baǵytyndaǵy shekaraǵa basymdyq berilip otyr. Sol sebepti ol jaqty kúsheitip jatyrmyz. Biraq rezerv bar, kez kelgen shekara ýchaskesin jaba alamyz”, - dedi Aldajumanov Senatta ótken brifingte.
Osy oraida Shekara qyzmetiniń basshysy shekarany kúzetýge ne sebepti qyrýar qarjy jumsalyp jatqanyn da túsindirdi. Onyń aitýynsha, KSRO kezinde 6 shekara otriady Qytaimen aradaǵy shekarany ǵana kúzetken.
Al Qazaqstan táýelsizdik alǵannan keiin barlyq shekarany kúzetýge týra keldi. Arnaiy qural-jabdyqtar men úi-jailardyń tapshylyǵy qatty sezilgen. Bertin kele, shekarashylardyń sany artty. Qazirgi kezde shekarashylardy kóbeitpei, tehnikalyq turǵyda baqylaý sharalaryna basymdyq beriledi. Oǵan kóp aqsha kerek.
“Naqty somasyn aitpai-aq qoiaiyn, óte kóp aqsha kerek. Mysalǵa bir shekara zastavasy 20 shaqyrymdy kúzetedi. Osy ýchaskeni qajetti infraqurylym jáne tehnikamen qamtamasyz etý úshin 2,9 milliard teńge qajet. Al Qazaqstandaǵy shekaranyń uzyndyǵy 15 myń shaqyrymnan asyp otyr”, - dep atap kórsetti Aldajumanov.
