Qyrǵyzstannyń Densaýlyq saqtaý ministrligi turǵyndardy koronavirýs infektsiiasyna qatysty seroepidemiologiialyq zertteýdiń birinshi kezeńin aiaqtady, dep habarlaidy Qyrǵyzstannyń Kabar agenttigi.
Ministrliktiń málimetinshe, atalǵan zertteý biylǵy jyldyń shilde-qazan ailary aralyǵynda Qyrǵyzstandaǵy Dúniejúzilik densaýlyq saqtaý uiymy keńsesiniń tehnikalyq qoldaýymen júrgizilgen.
Zertteýdiń maqsaty – Qyrǵyzstan turǵyndarynyń jynysy, jasy jáne geografiialyq taralýyna qarai COVID-19 infektsiiasyna popýliatsiialyq immýnitetin zertteý.
Zertteý qorytyndysy respýblikada jalpy alǵanda SARS-CoV-2 virýsyna antidene bar adamdardyń sany tamyz aiynyń basyna qarai 30,8 paiyzdy quraǵanyn kórsetti. Bul virýsqa seroprevalenttiliktiń (popýliatsiiadaǵy naqty aýrýdyń serologiia synama (qan sarysý) testinde oń nátijesi bar adamdar) joǵary deńgeii Naryn oblysynda (62,7%), Shý oblysynda (50,3%), Talas oblysynda (49%), Ystyqkól oblysynda (46%) jáne Bishkek qalasynda (52,2%) atap ótildi.
Atalǵan virýs antidenesin anyqtaýdyń tómen kórsetkishi respýblikanyń ońtústigindegi Batken oblysynda (13%), Jalal-Abad oblysynda (13,0%), Osh oblysynda (16,3%) jáne Osh qalasynda (14,6%) tirkelgen. Ońtústik aimaq turǵyndarynda antidene deńgeiiniń tómen paiyzy bul aimaqtarda test shilde aiynyń basynda, iaǵni antidene endi shyǵa bastaǵanda jasalǵanymen túsindiriledi. Soltústik aimaqtarda bolsa, taldaý shilde aiynyń sońy men tamyzdyń basynda jasalǵan.
Qazirgi málimet boiynsha, SARS-CoV-2 virýsyna antidenesi bar adamdardyń 70,8 paiyzynda COVID-19 virýsynyń klinikalyq belgisi bolǵan, sonyń ishinde 22,0 paiyzy meditsinalyq kómekke júginip, 6,0 paiyzy aýrýhanaǵa jatyp shyqqan.
Qyrǵyzstannyń densaýlyq saqtaý ministrligi elde koronavirýs infektsiiasymen kúres júrgizý sharalaryn arttyrýǵa septigin tigizetin kóptegen suraqtarǵa jaýap alýǵa múmkindik beretin atalǵan zertteýdi jalǵastyrý josparlanyp otyrǵanyn atap ótti.
