Asqar Salymbekov. Foto facebook.com
"Dordoi" qaýymdastyǵynyń prezidenti Asqar Salymbekov Qazaqstan Prezidenti Qasym-Jomart Toqaevtan shekaradaǵy keptelisterge nazar aýdarýdy surady, - dep habarlaidy Tengrinews.kz.
Kásipker málimdemesin Facebook-te jariialady. Ol Toqaevtan prezident Sadyr Japarovpen kezdesý qarsańynda Qyrǵyzstan halqyn tolǵandyratyn máselege nazar aýdarýyn surady.
"Ǵasyrlar boiy qyrǵyzdar men qazaqtar ortaq mádenieti, salt-dástúri, ádet-ǵurpy men tili boiynsha baýyrlas, týysqan halyq bolǵan. Olardyń artynda myńdaǵan jylǵa sozylatyn tarihi damý joly tur. (...)
Shekarada aýyr júk kólikteri kepteliste turyp qalǵanyna, taýar aǵyny toqtaǵanyna, al qarapaiym adamdar týystary men jaqyndarynyń jerleý rásimine de bara almaǵan jaǵdailarǵa birneshe ret kýá boldyq", - dep jazdy biznesmen.
Sonymen qatar, Salymbekov taýarlar men adamdardyń erkin qozǵalý qaǵidatyna negizdelgen Shengen aimaǵynyń tabysty jumysyn atap ótti.
"EAEO qurý ózara qarym-qatynastardyń naq osyndai formatyn kózdeidi. Bizge osy tájiribeni qoldanýǵa jáne saýda-ekonomikalyq yntymaqtastyq úshin Qyrǵyzstan men Qazaqstan arasyndaǵy shekarany keńinen ashýǵa ne kedergi?" - deidi ol.
Sóz sońynda Salymbekov shekaradaǵy problemalardy sheshý eki halyqtyń áleýmettik-ekonomikalyq jáne mádeni jaqyndasýyna serpin beretinin, sondai-aq biznes-qoǵamdastyqtardyń iskerlik belsendiligine áser etetinin aitty.
"Ekonomika óse bastaityn edi, qarapaiym adamdardyń ál-aýqaty deńgeii artar edi. Sizdiń Qyrǵyzstanǵa resmi saparyńyzdan keiin bizdiń baýyrlastyq jáne tatý kórshilik qarym-qatynastarymyzda kedergiler men problemalar joiylatyn betburys kezeńi bastalady dep úmittenemin", - dep túiindedi Salymbekov.
Buǵan deiin Keń-Býlýn beketi arqyly Qyrǵyzstannan Qazaqstanǵa óte almai turǵan júk kólikteriniń sany 200-ge jetkeni habarlanǵan edi. Kólik keptelisine ne sebep bolǵanyn ázirge eshkim túsindirmedi.
