Foto: eurasiatoday.ru
Qyrǵyzstanda prezident Sadyr Japarovtyń jieniniń burynǵy kúieý jigitine úkim shyqty, dep habarlaidy Ult.kz kaktus.media-ǵa silteme jasap.
Anyqtalǵandai, Bishkektiń Birinshi mai aýdandyq sotynyń 2025 jylǵy 10 qazanyndaǵy úkimimen S. A. J. (Aftandil Sabyrbekov) Qyrǵyzstan Respýblikasynyń Qylmystyq kodeksindegi «esirtki quraldaryn, psihotroptyq zattardy jáne olardyń analogtaryn satý maqsatynda zańsyz daiyndaý» jáne «prekýrsorlardy zańsyz daiyndaý» baptary boiynsha qylmys quramynyń bolmaýyna bailanysty kinásiz dep tanylyp, aqtaldy.
Budan bólek, Sabyrbekov Qyrǵyzstan Respýblikasynyń Qylmystyq kodeksiniń 267-baby 2-bóligi («Qarýdy, oq-dárilerdi zańsyz ainalymǵa engizý») boiynsha kináli dep tanyldy. Oǵan 2 jyl 6 ai merzimge bas bostandyǵynan aiyrý jazasy taǵaiyndaldy. Sonymen qatar, qamaýda ótkizgen ýaqyty esepke alynyp, bir kún qamaýda bolý eki kún bas bostandyǵynan aiyrý merzimine teńestirildi. Sabyrbekov 2024 jyldyń 4 shildesinen 2025 jyldyń 10 qazanyna deiin qamaýda bolǵan.
Aftandil Sabyrbekovke taǵaiyndalǵan bas bostandyǵynan aiyrý jazasy tolyq ótelgen dep esepteldi. Ol sot zalynda bosatyldy.
Sonymen qatar, onyń baýyry Tariel Sabyrbekov birneshe bap boiynsha is-áreketinde qylmys quramy bolmaǵandyqtan aqtaldy. Alaida ol Qyrǵyz Respýblikasynyń Qylmystyq kodeksindegi «Prokýrordyń, tergeýshiniń nemese anyqtaý organynyń qyzmetine kedergi keltirý» baby boiynsha kináli dep tanylyp, 2 jyl merzimge bas bostandyǵynan aiyrý jazasyna kesildi.
Bul jazasy da tolyq ótelgen dep tanylyp, Tariel Sabyrbekov sot zalynan bosatyldy.
Eske sala keteiik, Aftandil Sabyrbekov qoǵamǵa Qyrǵyzstan prezidentiniń jieni Lázzat Nurqojoevaǵa úilenýge usynys jasaǵan.
