Qyrǵyzstan prezidentiniń mindetin atqarýǵa kóshken parlament spikeri Talant Mamytov halyqqa joldaý arnady.
Memleket basshysynyń mindetin ýaqytsha atqaryp jatqan premer-ministr Sadyr Japarov keler jyly 10 qańtarda bolatyn prezident sailaýyna qatysatyn bolǵandyqtan, ókiletinen bas tartqan. Soǵan bailanysty, Qyrǵyz Respýblikasynyń konstitýtsiiasyna sáikes, prezident mindetin atqarý qyzmeti Jogorký keńesh tóraǵasy Talant Mamytovqa kóshti.
Joldaýynda Mamytov "kóp synaqtan ótken, erkindik pen ádildikti qurmet tutatyn halqymyz 5-6 qazandaǵy halyq tolqýlarynan keiin az ýaqytta jáne beibit jolmen saiasi daǵdarystan shyǵyp, birligin odan saiyn nyǵaita tústi" dedi.
"Jemqorlyqpen kúreste sheshýshi qadamdar jasalyp jatyr. Shaǵyn jáne orta biznesti qorǵap, damytý boiynsha jumys jandana tústi. Eldegi epidemiia jaǵdaiyn turaqtandyrý úshin profilaktikalyq sharalar qolǵa alynyp jatyr. Qyrǵyzstan jaqyn jáne alys sheteldermen áriptestikti ári qarai damytýǵa daiyn" degen Mamytov "barlyq halyqaralyq mindettemeler, munyń aldyndaǵy ekijaqty jáne kópjaqty kelisimder tolyq oryndalady" dep sendirdi.
Onyń aitýynsha, "halyqtyń talap etýimen elde konstitýtsiialyq reforma ázirlenip jatyr", al qazirgi basty mindet – 2021 jylǵy 10 qańtarǵa belgilengen prezident sailaýyn "ashyq ári ádil ótkizý".
"Barlyq kandidatqa birdei múmkindik berý arqyly halyqtyń erkin bildirýin qamtamasyz etýimiz kerek. Memleket basshysynyń mindetterin atqarýǵa kirisý arqyly halyq pen memleket aldyndaǵy jeke jaýapkershiligimdi sezinemin. Konstitýtsiialyq quqyǵymnyń sheńberinde, prezident mindetin atqarýshy retinde, adamdardyń beibit ómiri men eldiń tutastyǵyn qorǵaýǵa bar kúshimdi salamyn" dedi Talant Mamytov.
Qyrǵyzstanda 4 qazanda ótken parlament sailaýynyń nátijesimen kelispegen halyq 5-6 qazanda narazylyq bildirip, munyń sońy saiasi daǵdarysqa ulasqan. Ortalyq sailaý komissiiasy sailaý nátijesin joqqa shyǵarǵan. 15 qazanda prezident Sooronbai Jeenbekov otstavkaǵa ketti.
Konstitýtsiia boiynsha onyń ókileti parlament spikerine kóshýi kerek edi, biraq ol bul qyzmetten bas tartqandyqtan, 5 qazanda túrmeden bosatylyp, keiin premer-ministr qyzmetine taǵaiyndalǵan Sadyr Japarov memleket basshysy mindetin qosa atqarýǵa kóshti.
Prezident sailaýy 2021 jylǵy 10 jeltoqsanǵa belgilengen. Qyrǵyzstan prezidenttigi úshin baq synaýǵa niet bildirgen 63 adam Ortalyq sailaý komissiiasyna qujat tapsyrdy. Olardyń 8-i áiel, 55-i er adam, arasynda Sadyr Japarov ta bar.
Qyrǵyzstannyń birinshi vitse-premeri Artem Novikov premer-ministr qyzmetin ýaqytsha atqarady.
