Qyrǵyzstanda jańa parlament sailaýy 20 jeltoqsanda ótedi. Azattyqtyń Qyrǵyz qyzmetiniń habarlaýynsha, 21 qazanda Qyrǵyzstan ortalyq sailaý komissiiasynyń (OSK) otyrysynda osyndai sheshim qabyldanǵan.
Osyǵan deiin OSK sailaýdy 20 jeltoqsanda ótkizgen durys, nátijesin kelesi jyly qorytyndylaýǵa múmkindik paida bolady dep málimdegen edi.
Ortalyq sailaý komissiiasy parlamentte túrli saiasi kúshter bolýy qajet degen ideiany qoldap, Jogorký keńeshten zańnamaǵa tiisti ózgertýler enegizý máselesin qarastyrýdy ótingen.
Másele saiasi partiialardyń parlamentke ótýi úshin qajet paiyzdyq mejeni azaitý, kandidat quiýy tiis jarna kólemin qysqartý jáne ózge de ózgerister jaily bolyp otyr.
Qyrǵyzstanda 4 qazanda ótken parlament sailaýynan keiin elde saiasi daǵdarys ornaǵan. Sailaý nátijesin joiýdy talap etken narazylyq aktsiiasynyń sońy tártipsizdikke ulasty. 6 qazanǵa qaraǵan túni demonstrantta prezident apparaty men parlamnet otyrǵan "Aq úidi" basyp aldy. Izinshe Bishkekte túrli saiasi kúshter arasynda tartys kúsheidi. Sonyń nátijesinde ortalyq sailaý komissiiasy sailaý nátijesin joidy, prezident Sooronbai Jeenbekov otstavkaǵa ketti. Úkimet jetekshisi retinde tańdalǵan saiasatker Sadyr Japarovqa prezident mindetin atqarý da júkteldi.
Parlament depýtattary parlamentke ótý úshin partiialarǵa qajet paiyzdyq mejeni 7-den 3 paiyzǵa túsirýdi, kandidat quiýy tiis jarnany 5 mln somnan 1 mln somǵa deiin azaitýdy, sonymen birge turaqty tirkelgen orynnan basqa jaqta daýys berýge múmkindik beretin №2 formaǵa tyiym salý máselesin qarastyryp jatyr.
Osyǵan deiin 12 partiia ortalyq sailaý komissiiasynan "Birimdik", "Mekenim Kyrgyzstan" jáne "Kyrgyzstan" partiiasynyń "jasaǵan" zańbuzýshylyqtaryna quqyqtyq baǵa berýdi ótingen. Alaida sailaý komissiiasy ótinishti bas prokýratýra men ishki ister ministrligine jibergen. Shaǵym berýshiler ótinishte ákimshilik resýrsty asyra paidalaný, daýys satyp alý, daýys qupiialylyǵynyń buzylýy, qorqytý, qoqan-loqy siiaqty zańbuzýshylyqtar bolǵanyn atap kórsetken.
