Sońǵy kúnderi Qyrǵyzstan elinde koronavirýs infektsiiasyna qatysty jaǵdai kúrt nasharlady.
Buǵan deiin boljamdalǵandai, maýsym byltyrǵy jylǵydai el úshin kúrdeli synaqqa ainalýy múmkin. Statistika boiynsha, kún saiyn aýrýǵa shaldyǵýdyń jańa oqiǵalarynyń sany tek ósip keledi (kúnine 1000 oqiǵaǵa jaqyndap keledi). Vaktsinalaý júrgizilgenimen, preparattar ázirge bárine birdei jetip jatqan joq. Bul týraly "Ult aqparat" Qyrǵyzstannyń KABAR aqparat agenttigine silteme jasap habarlaidy.
Osyǵan bailanysty, jaqynda el biligi Qyrǵyzstanda koronavirýstyń úshinshgi tolqyny bastalyp ketkenin málimdedi. Túrli qaýipsizdik sharalary kúsheitilip, bilik halyqty densaýlyǵyna muqiiat qaraýǵa, qoǵamdyq oryndarda maska taǵýǵa, qoldy jii jýyp turýǵa úndep otyr.
Bishkekte budan da qatań sharalar engizý josparlanýda. Osylaisha, 17 maýsymnan bastap el astanasynda kóńil kóterý mekemeleriniń jumysyna qatysy bar birqatar shekteýler engiziletin bolady.
«Koronavirýs infektsiiasyna shaldyǵý oqiǵalarynyń kún saiyn ósimine bailanysty 2021 jyldyń 17 maýsymynan bastap oiyn-saiyq mekemeleri (túngi klýbtar, meiramhanalar, qoǵamdyq tamaqtaný oryndary, dámhana, karaoke, barlar), sonyń ishinde saýda, oiyn-saýyq ortalyqtarynda ornalasqan kóńil kóterý oryndarynyń jumys kestesine shekteý engizý sheshimi qabyldanǵan. Endi atalǵan oryndar túngi saǵat 23:00-den bastap tańǵy saǵat 7:00-ge deiin jumys isteitin bolady», - delingen Bishkek meriiasynyń málimdemesinde.
Ákimshilińten atap ótkendei, bul sheshim áleýmettik blok jónindegi vitse-mer Viktoriia Mozgachevanyń tóraǵalyǵymen ótken qalalyq tótenshe epidemiiaǵa jáne epizootiiaǵa qarsy komissiianyń otyrysy barysynda qabyldanǵan.
«Komissiia músheleri Bishkek qalasyndaǵy epidemiologiialyq jaǵdai men koronavirýs infektsiiasynyń odan ary taralýyn boldyrmaý boiynsha qabyldanyp otyrǵan sharalardy talqyǵa salǵan. Onyń qorytyndysy boiysha shekteý engizý týraly tiisti sheshim qabyldandy», - dep atap ótti qalalyq meriiadan.
Budan bólek, qoǵamdyq kólik ishinde sanitarlyq normalardyń saqtalýyn qadaǵalaý boiynsha reidter júrgiziledi. Bishkek vitse-meri el astanasyndaǵy aialdamalar men qoǵamdyq kólikterde maskalardy tegin taratý máselesi qarastyrylyp jatqanyn atap ótti.
