Qyrǵyzstanda parlament sailaýynyń nátijesimen kelispegen narazy jurt 6 qazanǵa qaraǵan túni prezident ákimshiligi men parlament otyratyn Aq úige basyp kirip, qazirgi prezident Sooronbai Jeenbekovtiń kabinetine deiin bardy. Bul týraly Azattyqtyń Qyrǵyz qyzmeti habarlady.
Jergilikti aqparat quraldarynyń jazýynsha, politsiia men arnaiy jasaq narazylarǵa eshqandai qarsylyq kórsetpegen.
Qyrǵyzstandyq belsendiler men saittar sailaý nátijesine qarsy shyqqandar Memlekettik ulttyq qaýipsizdik komitetiniń (MUQK) ǵimaratynda basyp alǵanyn aitady. Arnaiy jasaq halyqpen birge ekenin jetkizgen. Narazylardyń Bishkektegi ortalyq “Ala Too” alańynda tolyq baqylaýǵa alǵany habarlandy.
Prezident Sooronbai Jeenbekovtiń baspasóz hatshysy Tolgonoi Stamalieva AKIpress basylymyna prezidenttiń Bishkekte ekenin aitqan. Prezident 6 qazan tańerteń sailaýǵa qatysqan 16 partiianyń ókilderimen kezdesý ótkizýdi josparlaidy.
4 qazanda Qyrǵyzstanda parlament sailaýy ótip, oǵan 16 partiia qatysqan. Sailaýda "Birimdik", "Mekenim Kyrgyzstan", "Kyrgyzstan" jáne "Býtýn Kyrgyzstan" partiiasy 7 paiyzdyq mejeden ótken.
Jańa qurylǵan bilik partiiasy – "Birimdik" 24,5 paiyz daýys alsa, "Mekenim Kyrgyzstan" - 23,88, "Kyrgyzstan" 8,76 paiyz daýys jinaǵan.
Bul úsh partiia úkimetti qoldaityn saiasi uiymdar retinde sipattalady. "Birimdik" te, "Mekenim Kyrgyzstan" da Máskeý ústemdik etetin Eýraziia ekonomikalyq odaǵyn jaqtaidy jáne Reseimen qaýipsizdik salasynda jaqyn yntymaqtasý kerek dep esepteidi.
Oppozitsiiadan jalǵyz "Bútún Kyrgyzstan" partiiasy ǵana 7,13 paiyz daýyspen mejeden óte aldy. Dodaǵa túsken qalǵan 12 partiia parlamentke ótpei qaldy.
Jeńilgen partiialar sailaýshylardyń daýsyn satyp alý faktileri, ákimshilik resýrstardy paidalaný jaǵdailary bolǵanyn aitady.
5 qazanda Bishkektegi ortalyq alańda sailaý nátijesine qarsy narazylyq ótip, oǵan on myńdaǵan adam qatysty. Olar Jeenbekovtiń bilikten ketýin, qaita sailaý ótkizýdi talap etedi.
Keshke toǵyzǵa taman narazylar Aq úige kirmek bolǵan. Keiin politsiia kózden jas aǵyzatyn gaz, rezeńke oqpen narazylardy taratpaq boldy. Dárigerlerdiń málimetinshe, narazylyqta kem degende 120 adam jaralanǵan.
Arnaiy kúshter Ala Too alańy men Aq úidi qorshap, narazylardy qýa bastaǵan.
Keiin jurt narazylyǵyn qaita jalǵastyrdy. Bishkek ýaqytymen tańǵy 5-te narazylar taramai turdy.
