Bishkek qalasynda Qazaqstannyń meditsina kúnderi bastaldy. Eki kúndik sharaǵa elimizdiń Densaýlyq saqtaý ministri Eljan Birtanov bastaǵan 100-den astam delegat qatysýda, dep habarlaidy "Ult aqparat".
«Qyrǵyzstandaǵy qazaqstandyq meditsina kúnderi – bul Qazaqstan men Qyrǵyzstan densaýlyq saqtaý júieleri arasyndaǵy yntymaqtastyqty kúsheitýge, meditsinalyq uiymdar arasyndaǵy ózara is-qimyldy keńeitýge, eki eldiń azamattaryna meditsinalyq kómek kórsetýdiń qoljetimdiligi men sapasyn qamtamasyz etý jolynda tájiribe men bilimmen, inoovatsiialar men tehnologiialarmen almasýǵa baǵyttalǵan shara», - dep jazdy Densaýlyq saqtaý ministrliginiń baspasóz hatshysy Gaýhar Bisarina Facebook paraqshasynda.
Sharanyń ashylý rásiminde qutyqtaý sóz sóilegen Eljan Birtanov eki memleket yntymaqtasǵynyń joǵary deńgeiin, tarihi jáne mádeni tamyrlarynyń ortaqtyǵyn, sonymen qatar ózara qarym-qatynasty nyǵaityp, damytýda mundai sharalardyń mańyzyn atap ótti.
QR Densaýlyq saqtaý ministriniń atap ótýinshe, el Prezidenti Qasym-Jomart Toqaevtyń tapsyrmasy aiasynda 2020 jyldyń qańtarynan 2025 jylǵa qarai densaýlyq saqtaý salasynyń shyǵystary qazirgi jalpy ishki ónimniń 3,2 paiyzynan 5 paiyzǵa jetetin bolady. Al Elbasy Nursultan Nazarbaevtyń tapsyrmasyna sáikes 2025 jylǵa qarai alǵashqy meditsialyq-sanitarlyq kómek pen qoǵamdyq densaýlyqqa arnalǵan shyǵystardyń úlesi 60 paizǵa jetetin bolady.
Munan bólek Eljan Birtanov memlekettik qoldaýdyń jáne qarqyndy ári keshendi júrgizilgen jumystardyń nátijesinde sońǵy 5 jylda ana ólimi 2,6 ese, týberkýlezden bolatyn ólim-jitim 5,4 ese, qan ainalymy aýrýlarynan bolatyn ólim 2,5 ese, onkologiiadan bolatyn ólim 3,7 ese, al jaraqattanýdan bolatyn ólim-jitim 7,2 ese azaiǵanyn atap ótti. Sonymen qatar ol «Densaýlyq» memlekettik baǵdarlamasynyń qabyldanýy meditsinalyq kómektiń tiimdiligi men qoljetimdiligin arttyrýǵa baǵyttalǵan qajetti institýttyq ózgeristerdi júzege asyrýǵa múmkindik bergenin aitty.
