Sýretter: Ulyqbek Berdishovtiń týystary joldaǵan. Kollaj: Tengrinews.kz
Qyrǵyzstanda asylyp qalǵan kúii tabylǵan qazaqstandyq sarbazdyń týystary qazaǵa bailanysty pikir bildirdi. Elitar.kz basylymyna bergen suhbatynda marqumnyń anasy Orynkúl Merekova balasy ózine qol jumsaýy múmkin emes ekenin málimdedi, - dep habarlaidy Tengrinews.kz tilshisi.
Aita keteiik, kýrsant Jambyl oblysy Merki aýdany Andas batyr shekara zastavasynda boryshyn ótegen. 2 naýryzda ol joǵalyp ketip, 10 sáýirde ǵana Qyrǵyzstan aýmaǵynan óli tabylǵan.
"Ol sabyrly bala bolatyn. Ózine qol jumsaýy múmkin emes. Onyń ólimine kináliler baryna senimdimin. Balam shekara syzyǵyn ótýge bolmaitynyn bilgen, komandirleri qatań túrde eskertken. Ol qalai shekaradan ótip, qyrǵyz aýmaǵynan biraq shyqty? Joǵalǵannan keiin 39 kún ótkende ǵana tabyldy, osy ýaqytta onyń denesi shirip keter edi. Birdeńe bolǵany anyq. Taiaýda demobilizatsiiadan meniń balammen birge qyzmet etken jergilikti balalardyń biri oralǵan. Ol Ulyqbekpen áńgime barysynda áskerde qyzmet etý eshkimniń basyna bermesin degendi aitqanyn esine alyp otyr", - deidi marqumnyń sheshesi.
Áiel balasymen telefon arqyly sóileskeninde onyń áldene jasyrǵandai bolǵanyn sezgenin aitady. Onyń sózinshe, Ulyqbek aitary baryn habarlaǵan. Soǵan qaraǵanda, ol starshinasynyń qasynda turyp sóilesken siiaqty, sebebi bóten adamnyń telefonynan habarlasqan.
Áiel 2 naýryzda túngi ýaqytta balasy joǵalǵanyn esti sala Jambyl oblysyndaǵy shekara zastavasy ornalasqan aýylǵa jetkenin aitady.
Onyń aitýynsha, balasynyń qyzmettesteriniń is-áreketi ádettegidei bolmaǵan, qarym-qatynastan qashqaqtaǵan-mys, áldene jasyrǵandai júrgen kórinedi.
Qaza tapqan sarbazdyń anasy balasyn belgisiz bireýler kezdeisoq óltirip alǵan bolýy múmkin ekenin, keiin 39 kún ótken soń tabylǵan jerine aparyp tastaǵan bolýy múmkin ekenin aitady.
"Sotqa berip, balamnyń ólimine kinálilerdi zań boiynsha jazalaýdy talap etemin. Balamdy óli qaitarý úshin jibergenim joq", - deidi ashynǵan ana.
"Biz ol tiri dep kúder úzbei keldik. Amal ne, jazýy osy boldy. Túsiniksiz, kúmándi jaǵdai kóp. Andas batyr aýylyndaǵy ákimdik ǵimaratynda áskeriler Ulyqbektiń kiimderin berdi. Kiimi taza. Biz izdegen qyryq kúnge jýyq ýaqytta kiimi ashyq aspan astynda jatsa, bulai bolmas edi ǵoi. Tapqan kezde denesi jartastan asylyp turǵan, osy kúnder boiynda dál osylai ilinip turdy deýge kelmeidi", - deidi marqumnyń aǵasy Baýyrjan Merekov.
Buǵan deiin QR UQK Shekara qyzmeti departamenti basshysynyń orynbasary polkovnik Qairat Tuiaqov qatardaǵy jaýynger Berdishov sharýa jumysynda "atqorany tazalaýmen ainalysyp júrgeninde joǵalǵanyn" habarlaǵan.
10 sáýirde Qyrǵyzstan territoriiasynda jergilikti shopan áskeridiń kiimin taýyp alyp, kedenshilerge ótkizgen. Osy jerden júz shaqyrymdai jerde sarbaz óli tabylǵan. 19 jastaǵy jigit jartasta óz beldigine asýly kúiinde tabylǵan. Qalǵan zattary ózinde bolǵan.
Resmi nusqa boiynsha, kýrsanttyń ólimine mehanikalyq asfiksiia sebep bolǵan. Denesine jaraqat izi bolmaǵany da habarlanǵan.
