Qyrǵyzstan prezidenti Sadyr Japarov 19 qyrkúiekti jalpyulttyq aza tutý kúni dep jariialaý týraly jarlyqqa qol qoidy. Bul jóninde memleket basshysynyń baspasóz qyzmeti habarlady.
Jarlyqta "14-17 qyrkúiek aralyǵynda qyrǵyz-tájik shekarasynda bolǵan qaqtyǵystyń saldarynan qyrǵyz azamattary opat bolǵany", soǵan orai aza tutý kúni jariialanǵany jazylǵan.
"Jalpyulttyq aza tutý kúni eldiń barlyq aýmaǵynda, sonymen birge sheteldegi diplomatiialyq jáne konsýldyq mekemeler ǵimaratynda QR memlekettik týy túsirilsin, mádeniet mekemeleri men teleradiokompaniialarǵa oiyn-saýyq sharalary men baǵdarlamalaryn ótkizbeýge keńes berilsin" dep jazylǵan jarlyqta.
Qyrǵyzstan UQMK shekara qyzmetiniń habarlaýynsha, 18 qyrkúiek saǵat 14.00-tegi jaǵdai boiynsha shekaradaǵy ahýal turaqtalǵan.
Eske salaiyq, 16 qyrkúiekte qyrǵyz-tájik shekarasynda iri qaqtyǵys boldy. Taraptar oqiǵaǵa bir-birin kinálady. Sol kúni atysty toqtatý týraly kelisim jasalǵanmen shekarada atys qaita jalǵasqan. Qyrǵyzstannyń Batken oblysynda tótenshe jaǵdai jariialandy.
17 qyrkúiekte de shekarada qaqtyǵys tynshymady, taraptar bir-birin kelisimdi buzdy dep aiyptady. Azattyqtyń Qyrǵyz qyzmetiniń jazýynsha, bul joly Osh oblysynyń Chon-Alai aýdanynda qaqtyǵys bolǵan.
Qyrǵyzstan densaýlyq saqtaý ministrliginiń málimetinshe, qaqtyǵystyń saldarynan 36 adam qaza bolǵan, arasynda beibit turǵyndar da bar. Keminde 140 adam zardap shekken.
Al Tájikstan biligi qaza bolǵandar men jaralanǵandar týraly resmi aqparat taratpady. Azattyqtyń Tájik qyzmeti derekkózge súienip, shekaradaǵy qaqtyǵystan 39 tájik azamaty qaza bolǵanyn jazdy. Arasynda beibit turǵyndar da bar ekeni aitylady. Tájik biligi ázirge bul aqparatty rastaǵan joq, teristemedi de.
