Qyrǵyz tarapy kedendegi kemshilikterdi retke keltirý usynysyna áli resmi túrde jaýap bergen joq. Alaida osylai jalǵasa berse, kedendegi baqylaý jumysyn kúsheite beremiz. Bul týraly «Jańa Eýraziia: Eýro-aziialyq transqurlyqtyq marshrýttarda kólik-logistikalyq júielerdi damytý» taqyrybynda ótip jatqan halyqaralyq konferentsiianyń kýlýarynda Memlekettik kirister komiteti tóraǵasynyń orynbasary Ǵosman Ámrin aitty, dep habarlaidy Baq.kz tilshisi.
«Ótken jyldary bul másele qyrǵyz tarapymen birneshe ret talqylanǵan. Eýraziialyq ekonomikalyq komissiiaǵa erekshe tapsyrma berilip, olardyń baiandaýy boiynsha qyrǵyz tarapynyń keden salasyna qatysty kemshilikteri dáleldengen. Ol anyq. Endigi kezekte atalǵan máseleni sheshýdiń qandai joly bar? Ol – Qyrǵyz Respýblikasynyń keden qyzmetimen birlesip jumys atqarý», - dedi komitet tóraǵasynyń orynbasary jýrnalisterge.
Sonymen qatar Ǵosman Ámrin shekaradaǵy máseleni sheshý úshin Qazaqstan tarapynan Qyrǵyz Respýblikasyna birneshe usynys joldanǵanyn atap ótti.
«Ótken jyly Úkimettiń tapsyrmasymen Qyrǵyzstanǵa bardyq. Olarǵa naqty qandai másele baryn aittyq. Ekinshiden, osy jyly qaitadan bul máseleni kóterip otyrmyz. Jaǵdai ózgergen joq. Bárin de kedendik erejeler men talaptardy jipke tizgendei aityp berdik. Alaida odan oń nátije bolǵan joq. Jalpy Qyrǵyzstan tarapy «iá, qaraiyq, jumysty kúsheiteiik, kontrabandaǵa jol bermeiik» dep aitqan. Endigi kezekte atqarylatyn jumys boiynsha kelisip, bárin birge retteiik dep otyrmyz. Iaǵni olardan jaýap kútýdemiz», - dedi ol.
Osy oraida Memlekettik kirister komiteti tóraǵasynyń orynbasary qos el arasyndaǵy máseleni qalai sheshýge bolatyn jetkizdi.
«Birinshiden, eki jaqqa da taýardyń quny birdei bolýy kerek. Salyqtarymyz birdei bolýy tiis. Kedende olar taýardy 1 dollarmen, biz 10 dollarmen alsaq, olai bolmaidy. Ekinshiden, barlyq tarapqa birdei qarap otyrǵanymyzdy bildirdik. Búginge deiin usynysymyz bireý, ol kedende birlese jumys atqarý. Úshinshiden, bir-birimizge «qandai taýarlar, qandai baǵamen keldi» degen aqparatty almasyp otyraiyq degen usynysty joldadyq. Taǵy da qaitalap aitamyn: baýyrlas el bolǵandyqtan, bul máseleni birlese sheshýge tyrysýymyz kerek. Eger olar kelispeitin bolsa, biz tek qana baqylaý jumysyn kúsheite beremiz», - deidi Ǵosman Ámrin.
