Qazaqstan biligi bir aiǵa jetpeitin ýaqytta Qyrǵyzstannan keletin birneshe myń kólik tekserilip, nátijesinde Qazaqstan zańyn buzýdyń júzdegen faktisi anyqtalǵanyn habarlady.
"2017 jyldyń 10-30 qazany aralyǵynda investitsiia jáne damý ministrligi transport komitetiniń ókilderi Qyrǵyzstan tasymaldaýshylary tarapynan 360 zań buzýshylyqty anyqtady. Bul kezeńde Qyrǵyzstannan keletin 3054 kólik tekserildi" delingen ministrlik saitynda jariialanǵan habarlamada.
Komitet málimetinshe, tekserý nátijesinde tasymaldaýshylarǵa jalpy somasy 11,8 million teńge (shamamen 357 myń dollar) aiyppul salynǵan. Ministrlik tez buzylatyn taýarlardy sertifikatsyz tasymaldaýdy eń kóp kezdesetin zań buzý dep ataidy. Zań buzýshylyqtyń shamamen 40 paiyzy (151) sertifikatsyz taýar tasymaldaý úlesinde.
Komitet buǵan qosa taýar-kólik qujatynyń joqtyǵy, júk pen kólik salmaǵyna qoiylatyn talaptardyń buzylýy, turaqty emes jolaýshy tasymalynda tranzittik poiyzdarda ruqsat beretin qazaqstandyq blankanyń joqtyǵy siiaqty zań buzý túrleri kezdesetinin aitady.
10 qazannan bastap eki el shekarasynda tekserý kúsheitilip, Qazaqstanǵa ótetin adamdar men kólikter kezegi paida bolǵan. Tekserýdiń kúsheitilýinen eń aldymen tez buzylatyn azyq-túlik tasityn úlken júk kólikteriniń júrgizýshileri zardap shegip jatyr.
25 qazanda Erevanda ótken EAEO úkimet basshylarynyń sammiti kezinde Qazaqstannyń premer-ministri Baqytjan Saǵyntaev Qyrǵyzstan men Qytai arasyndaǵy taýar almasýdyń kóleminde aiyrmashylyq óte úlken ekenin aityp, shekaradaǵy tekserý arnaiy jasalmaǵanyn málimdegen.
