Búgin Aqorda rezidentsiiasynda Qyrǵyz Prezidenti Sadyr Japarovty saltanatty qarsy alý rásimi ótken bolatyn.
Sondai-aq shaǵyn jáne keńeitilgen quramda kelissózder júrgizildi.
Qazaqstan men Qyrǵyzstan Prezidentteri osy kelissózderden soń birlesken málimdeme jasady.
Málimdemede ózge máselelermen qatar eki eldiń pandemiianyń jalǵasýy jaǵdaiynda koronavirýs infektsiiasyna qarsy birlesken is-qimyldy jandandyrý mańyzdylyǵy sóz boldy.
Osy turǵydan qyrǵyz tarapy Qazaqstan Respýblikasynyń járdemi men kómek kórsetýge ázirligi, sonyń ishinde, gýmanitarlyq sipattaǵy qoldaýy úshin rizashylyq bildirdi.
«Epidemiologiialyq talaptardy saqtaý qajettigin moiyndai otyryp, taraptar memleketterdiń aýmaǵy arqyly azamattardyń jáne kólik quraldarynyń tranziti men erkin qozǵalysy úshin kelisilgen sharalardy qabyldaý mańyzdylyǵyn atap ótedi»,-delingen málimdemede.
Qujatta eki eldiń qarym-qatynasyna qatysty budan ózge de keń aýqymdy máseleler qamtylǵan.
