Qyrǵyz-tájik shekarasyndaǵy qaqtyǵysta qiraǵan úi. Batken oblysy. Qyrǵyzstan. 2 mamyr 2021 jyl.
Qyrǵyzstan men Tájikstan ókilderi shekara máselesi boiynsha kelissóz ótkizdi, dep habarlaidy Azattyq.
Qyrǵyz delegatsiiasyn Qyrǵyzstan prezidentiniń Batken oblysyndaǵy ókiletti ókili Ábdikárim Álimbaev, tájik delegatsiiasyn Tájikstannyń Soǵdy oblysynyń gýbernatory Radjapboi Ahmadzoda bastap kelgen.
Eki eldiń shekaralas aýdandarynyń basshylary men kúsh qurylymdary da qatysqan kezdesýde shekara mańyndaǵy qaýipsizdik máselesi talqylanǵan.
-Eki eldiń kúsh qurylymdarynyń birlesken patrýl qyzmetin kúsheitý, shekara mańynda okop qazbaý, ózara kelisimmen ǵana video baqylaý ornatý týraly aityldy. Jergilikti halyq arandap qalmaý úshin túsindirý jumystaryn júrgizý sóz boldy, - deidi Qyrǵyzstan tarapynan kelissózge qatysqan Musyrmanbek Tursumatov.
Qyrǵyzstannyń Batken oblysyndaǵy ókiletti ókiliniń baspasóz qyzmeti 17 tamyzdan bastap shekarashylar men quqyq qorǵaý organdary shekara mańynda jaǵymsyz kórinisterge jol bermeýge arnalǵan birlesken oqýdy bastaitynyn málimdedi.
Qyrǵyzstan men Tájikstan arasyndaǵy shekaranyń uzyndyǵy 970 km. Onyń 519 km ǵana naqtylanǵan. Biyl shildeniń sońynda eki tarap taǵy da 40 km shekara boiynsha ortaq kelisimge kelgeni habarlanǵan.
Shekaranyń naqty belgilenbeýine bailanysty eki el arasynda birneshe ret qarýly janjal bolǵan. Biyl 28 sáýir men 1 mamyr aralyǵyndaǵy qaqtyǵysta Qyrǵyzstannyń 36 adamy ólip, 180 adamy jaralanǵan. Tájikstannan 19 adam ólip, 87 adam jaralanǵan.
