قىرعىز-تەجٸك شەكاراسىنداعى قاقتىعىستا قيراعان ٷي. باتكەن وبلىسى. قىرعىزستان. 2 مامىر 2021 جىل.
قىرعىزستان مەن تەجٸكستان ٶكٸلدەرٸ شەكارا مەسەلەسٸ بويىنشا كەلٸسسٶز ٶتكٸزدٸ, دەپ حابارلايدى ازاتتىق.
قىرعىز دەلەگاتسيياسىن قىرعىزستان پرەزيدەنتٸنٸڭ باتكەن وبلىسىنداعى ٶكٸلەتتٸ ٶكٸلٸ ەبدٸكەرٸم ەلٸمباەۆ, تەجٸك دەلەگاتسيياسىن تەجٸكستاننىڭ سوعدى وبلىسىنىڭ گۋبەرناتورى رادجاپبوي احمادزودا باستاپ كەلگەن.
ەكٸ ەلدٸڭ شەكارالاس اۋداندارىنىڭ باسشىلارى مەن كٷش قۇرىلىمدارى دا قاتىسقان كەزدەسۋدە شەكارا ماڭىنداعى قاۋٸپسٸزدٸك مەسەلەسٸ تالقىلانعان.
-ەكٸ ەلدٸڭ كٷش قۇرىلىمدارىنىڭ بٸرلەسكەن پاترۋل قىزمەتٸن كٷشەيتۋ, شەكارا ماڭىندا وكوپ قازباۋ, ٶزارا كەلٸسٸممەن عانا ۆيدەو باقىلاۋ ورناتۋ تۋرالى ايتىلدى. جەرگٸلٸكتٸ حالىق ارانداپ قالماۋ ٷشٸن تٷسٸندٸرۋ جۇمىستارىن جٷرگٸزۋ سٶز بولدى, - دەيدٸ قىرعىزستان تاراپىنان كەلٸسسٶزگە قاتىسقان مۇسىرمانبەك تۇرسۇماتوۆ.
قىرعىزستاننىڭ باتكەن وبلىسىنداعى ٶكٸلەتتٸ ٶكٸلٸنٸڭ باسپاسٶز قىزمەتٸ 17 تامىزدان باستاپ شەكاراشىلار مەن قۇقىق قورعاۋ ورگاندارى شەكارا ماڭىندا جاعىمسىز كٶرٸنٸستەرگە جول بەرمەۋگە ارنالعان بٸرلەسكەن وقۋدى باستايتىنىن مەلٸمدەدٸ.
قىرعىزستان مەن تەجٸكستان اراسىنداعى شەكارانىڭ ۇزىندىعى 970 كم. ونىڭ 519 كم عانا ناقتىلانعان. بيىل شٸلدەنٸڭ سوڭىندا ەكٸ تاراپ تاعى دا 40 كم شەكارا بويىنشا ورتاق كەلٸسٸمگە كەلگەنٸ حابارلانعان.
شەكارانىڭ ناقتى بەلگٸلەنبەۋٸنە بايلانىستى ەكٸ ەل اراسىندا بٸرنەشە رەت قارۋلى جانجال بولعان. بيىل 28 سەۋٸر مەن 1 مامىر ارالىعىنداعى قاقتىعىستا قىرعىزستاننىڭ 36 ادامى ٶلٸپ, 180 ادامى جارالانعان. تەجٸكستاننان 19 ادام ٶلٸپ, 87 ادام جارالانعان.
