Qyrǵyzstanda altyn óndiretin Qumtór kenishi úshin tartys kúsheidi. Memlekettik komissiia úkimetke kenishti basqarýdy ýaqytsha qolǵa alýdy usyndy. Al ony igerýmen ainalysatyn kanadalyq Centerra Gold Ortalyq Aziiada altyn óndiretin eń iri kenishterdiń birin memleket menshigine qaitarmaq bolǵany úshin Bishkekti sotqa beretinin málimdedi.
Memlekettik komissiia tóraǵasy Aqylbek Japarov 17 mamyrda "jemqorlyq, qaýipsizdik tehnika erejeleriniń buzylýy jáne qorshaǵan ortany qorǵaý talaptarynyń saqtalmaýyna" bailanysty Centerra Gold kompaniiasyna kenishti bermeý týraly sheshim qabyldanǵanyn málimdedi.
"Memlekettik komissiia Qumtór boiynsha 1992, 2003, 2009 jáne 2017 jyldary jasalǵan kelisimder Qyrǵyzstannyń ulttyq múddesine sáikes kelmegenin anyqtady. Olar Qyrǵyzstannyń memlekettik sýverenitetine nuqsan keltiredi jáne sol kezdegi qyrǵyz sheneýnikteriniń jemqorlyq múddeleri negizinde qabyldanǵan" dedi Aqylbek Japarov.
Bir kún buryn Centerra Gold-tyń Bishkek ústinen arbitraj sotyna shaǵym túsirgeni belgili bolǵan. Shaǵym ieleri Qumtórdi syrttai baqylaýǵa múmkindik beretin jaqynda qabyldanǵan zań kenish boiynsha jasalǵan investitsiialyq kelisimdi buzady dep sanaidy.
