Qyrǵyzstan men Armeniiadan ákelingen avtokólikter sheteldik taýarlar bolyp esepteledi jáne kedendik baqylaýǵa jatady, dep habarlaidy "Ult aqparat" Qarjy ministrliginiń Memlekettik kirister komitetine silteme jasap.
Memlekettik kirister komitetiniń málimetinshe, qazirgi ýaqytta halyq jeke paidalanýǵa arnalǵan avtomobilderdi ákelýge belsendi qyzýshylyq tanytyp otyr. Suraq kóbinese úshinshi elderden ákelinetin avtomobilder boiynsha, sondai-aq Eýraziialyq ekonomikalyq odaqqa múshe Armeniia, Belarýs, Resei jáne Qyrǵyzstannan ákelinetin avtomobilder boiynsha qoiylady.
«Úshinshi elderden ákelinetin avtomobilder, iaǵni sheteldik avtomobilderdi ýaqytsha 1 jylǵa sheteldik tulǵalar eshqandai kedendik tólemderdi tólemei ákele alady. Eýraziialyq ekonomikalyq odaqqa múshe memleketterdiń tulǵalary sheteldik avtomobilderdi tek kedendik tólemderdi qamtamasyz etken jaǵdaida ýaqytsha 1 jylǵa ákele alady, bul degenimiz qarjylyq kepil bolyp tabylady», delingen habarlamada.
Komitettiń habarlaýynsha, Qazaqstan azamattary el aýmaǵyna 2014 jylǵy 1 qańtarǵa deiin Qyrǵyzstanda rásimdelgen avtomobilderdi jáne 2014 jylǵy 10 qazanǵa deiin Armeniiada rásimdelgen avtomobilderdi ǵana ákele alady.
«Qyrǵyzstanda 2014 jylǵy 1 qańtardan bastap 2020 jylǵy 1 qańtarǵa deiingi kezeńde; Armeniiada 2014 jylǵy 10 qazannan bastap 2020 jylǵy 1 qańtarǵa deiingi kezeńde rásimdelgen avtomobilder sheteldik taýarlar bolyp tabylady jáne kedendik baqylaýǵa jatady. Kórsetilgen avtomobilderdi Qazaqstan aýmaǵyna tek Qyrǵyzstanda jáne Armeniiada turaqty turatyn tulǵalar ýaqytsha ákele alady», delingen habarlamada.
Komitet Qyrǵyzstanda jáne Armeniiada turaqty turmaityn tulǵalar atalǵan avtomobilderdi Qazaqstan Respýblikasynyń aýmaǵyna qandai jaǵdaida ákele alatynyn túsindirdi.
«Jeke paidalanýǵa arnalǵan taýarlarǵa bailanysty keibir máseleler týraly» Eýraziialyq ekonomikalyq komissiia keńesiniń 2017 jylǵy 20 jeltoqsandaǵy № 107 sheshimniń 2-qosymshasynda kórsetilgen mólsherlemeler boiynsha kedendik bajdar, salyqtar somalarynyń aiyrmasy mólsherinde kedendik bajdardy, salyqtardy tólegennen keiin elge avtomobildi ákele alady. Al Armeniiadan kólik ákelýi boiynsha 2023 jylǵy 1 qańtardan keiin ǵana, Qyrǵyzstannan 2025 jyldyń 1 qańtarynan keiin kólik ákele alady», delingen habarlamada.
Komitet elimizde Mońǵoliiadan ákelingen jáne keiinnen Qazaqstannyń ishki ister organdarynda tirkeý esebine zańsyz qoiylǵan avtomobilder bar ekenindigi atap ótti.
«Osyndai avtokólik quraldary sheteldik taýar bolyp esepteledi jáne olar boiynsha tiisti sharalar qabyldanady», dep málim etti vedomstvodaǵylar.
Memlekettik kirister komiteti avtomobil satyp alarda aýmaqtyq memlekettik kirister organdaryna júginip, avtomobildiń kedendik tazartýdan ótkendigi jáne zańdy ákelingendigin tekserip alýǵa keńes beredi.
