Qyrǵyzstan prezidenti mindetin atqarýshy premer-ministr Sadyr Japarov 12 qarasha kúngi baspasóz máslihaty kezinde Bishkek Qytaiǵa Naryn oblysyndaǵy Jetim-Taý kenishin berip, qaryzynan qutylady degen aqparatty joqqa shyǵardy.
Onyń sózine qaraǵanda, Qytaiǵa osy kenish shikizatyn berip, qaryzdan qutylý máselesi talqylanǵan.
"Qaryzdan qutylý amaldaryn izdestirip jatyrmyz. Ol bar jáne ony tabamyz da. Al kenishti berý týraly aqparattyń bári - sybys. Bul kenishte 5 mlrd tonnadan astam temir bar, bul degenińiz shamamen 50 mlrd dollar. Qaryzdy shikizatpen óteý jolyn talqylaǵanbyz. Bul nusqa áli de qarastyrylyp jatyr. Eger shikizatpen ótesek, 1 jylda shamamen 1 mlrd dollardan qutyla alamyz" dedi Japarov.
3 qarashada jergilikti telearnalardyń birine suhbat bergen Sadyr Japarov "memleket qaryzyn tabiǵi resýrstardyń kómegimen tóleýge bolady" dep málimdegen.
Qyrǵyzstan ár jyldary túrli memleketter men uiymdardan 200-den astam nesie alǵan. Olardyń 98 paiyzdan astamy 0,75-2 paiyzdyq mólsherlememen alynǵan, óteý merzimi 40 jylǵa deiin sozylady.
Qaryzdyń 42,5 paiyzy nemese 1,8 mlrd dollar Qytai eksport-import bankiniń ("Eksimbank") úlesinde.
Osyǵan deiin Qyrǵyzstan nesie tólemin keiinge shegerýdi suraǵanmen Qytaidyń odan bas tartqany habarlanǵan edi.
