Foto: akorda.kz
Biyl Qyrǵyzstanda sýarmaly sý tapshylyǵyn sheshý úshin jańa táýliktik (TRB) jáne onkúndik (ORB) retteýshi basseinder salynady, bul kórshi elderdi de sýmen qamtamasyz etýge jaǵdai jasaidy. Bul týraly Kabar aqparat agenttigine bergen suhbatynda Qyrǵyz Respýblikasynyń Prezidenti Sadyr Japarov málimdedi, dep habarlaidy Kazinform agenttigi.
Qyrǵyzstandaǵy TRB jáne ORB-da sý jinaý sýarý maýsymy kezinde sýdyń tómengi jaǵyndaǵy elderge kómektese me degen suraqqa túsinikteme bere otyryp, Sadyr Japarov onyń tapsyrmasymen el boiynsha jańa táýliktik jáne onkúndik retteýshi basseinder salynatynyn, sondai-aq qoldanystaǵylary tazartylatynyn, bul óz kezeginde sýarý maýsymynda aǵyndy sýǵa qatysty daýlar týyndaityndyqtan, eń aldymen tómengi aǵystaǵy kórshiles elderge paida ákeletinin atap ótti.
«Qysta TRB jáne ORB-ǵa erigen sýdy jinaityn bolsaq, kóktemnen bastap ózen sýy kórshilerge tolyǵymen aǵyp ketedi. Iaǵni olar burynǵydan da kóp sý alady. Sýarý maýsymynda diqandarymyz TRB jáne ORB sýyn, al kórshilerimiz aǵyndy sýdy paidalana alady.
Ótken joly Bishkekti sý basyp ketkenin kórdińiz. Joǵarǵy táýliktik retteýshi basseinderdiń joqtyǵynan sý qalaǵa aǵyp, kóshelerdi sý basty. Eger TRB bolsa, bul sýdy saqtaýǵa bolar edi. Bul jaǵdai elimizdiń barlyq aimaqtarynda oryn alyp otyr. Eger qysta sý qoryn jinasaq, ol kórshilerimizge de molynan jeter edi.
Qysta aǵyp jatqan aǵyndy sýdy keiinnen daý týmas úshin tiimdi paidalanýǵa tyrysamyz. Kórshilerimizge qansha sý qajet bolsa, sonsha beremiz. Solai bolady», — dedi prezident.
Qyrǵyzstan basshysynyń aitýynsha, ótken jyldary salynǵan TRB men ORB tazartylmaǵan, osy sebepti sý jetkiliksiz jinalyp, sýarý maýsymynda jergilikti sharýalar sý tapshylyǵyn kórgen. Biyl barlyq basseinderde tazalaý jumystary júrgiziledi.
Qyrǵyz Respýblikasynyń Prezidenti Qambar-Ata SES-1 salý máselesine de toqtaldy.
«Bul sý elektr stansasynan kórshiler sý resýrstary túrinde paida kóredi, al Qyrǵyzstan tek elektr qýatyn ǵana alyp otyr. Biz Naryn sýynyń 1 paiyzyn ǵana sýarý men aýyz sýǵa paidalanamyz, al 99 paiyzy Ózbekstan men Qazaqstanǵa ketedi. Qambar-Ata SES-1 salynyp bitkende, biz ony qysta elektr qýatyn óndirýge, al sýarý maýsymynda kórshilerimizge Toktogýl SES-ta jinalǵan sýdy jetkilikti mólsherde berýge múmkindik alamyz», — dep túsindirdi S. Japarov.
Sadyr Japarov Qyrǵyzstan qysta elektr qýatyn óndirý úshin Toktogýl sý elektr stansasyn paidalanatynyn, alaida eldi elektr qýatymen qamtamasyz etý úshin jazda kelesi qysqy kezeńge sýdy únemdeý úshin ony toqtatýǵa týra keletinin atap ótti. Olar osy máselelerdi sheshý úshin jumys istep jatyr.
«Biz ózimizdi ǵana emes, kórshilerimizdi de oilaimyz. Máńgilik kórshi bolǵan soń, eń mańyzdy máselelerdi oilaýymyz kerek. „Sý basynda bolyp, sý bermeimiz“ dep aitý ábestik. Bárimiz baýyrlas halyqpyz, máńgi kórshimiz jáne bir-birimizge táýeldimiz. Barlyǵyn tizbei-aq qoiaiyn, muny halyq jaqsy biledi», — dep túiindedi ol.
