Eýroodaqtyń syrtqy saiasat jónindegi joǵarǵy ókili Jozep Borrel Qyrǵyzstandaǵy oqiǵalarǵa bailanysty málimdeme jasady.
Eýroodaq parlament sailaýynyń nátijesi joiylǵannan keiin prezident Sooronbai Jeenbekovtiń otstavkaǵa ketýin qaperge aldy delingen Eýroodaqtyń Qyrǵyzstandaǵy ókildiginiń resmi saitynda jariialanǵan málimette.
"Prezident ókiletin halyqaralyq mindettemelerdi, onyń ishinde zań ústemdigi, adam quqyǵy men negizgi erkindikti saqtai otyryp, Qyrǵyzstan Konstitýtsiiasynyń quqyqtyq aiasynda atqarý óte mańyzdy. Osyǵan orai Jogorký Keńesh spikeriniń prezident ókiletin premer-ministr Sadyr Japarovqa tapsyrýy birqatar suraq týyndatyp otyr, sebebi Qyrǵyz Respýblikasy parlamenttik demokratiia ornaǵan el, onda ókiletti bólý saqtalýy tiis" dedi Borrel.
Ol eldegi saiasi kúshterdi azamattyq qoǵammen konstrýktivti, jan-jaqty dialog ornata otyryp, jańadan erkin ári ádil parlament jáne prezident sailaýyn ótkizý máselesin talqylaýǵa shaqyrdy.
Eýroodaq Ortalyq Aziiadaǵy arnaiy ýákili men Qyrǵyzstandaǵy ókildigi arqyly eldegi barlyq saiasi kúshter men halyqaralyq qaýymdastyqpen bailanysta ekenin atap ótken.
15 qazanda prezident Sooronbai Jeenbekov prezident qyzmetinen ketken. Otstavkaǵa ketý týraly málimdemesinde ol elde qoǵamdyq-saiasi jaǵdai áli ýshyǵyp tur, agressiia basylǵan joq, al otstavkaǵa ketý týraly talaptar tyiylǵan joq dep málimdegen. Ol Qyrǵyzstan tarihynda óz halqyna oq atqan prezident retinde qalǵysy kelmeitinin aityp, otstavkaǵa ketý týraly sheshim qabyldaǵan.
Al Bishkektegi "Ystyqkól" qonaqúiiniń aldynda miting ótkizip turǵandar talaptaryn ózgertip, Jogorký Keńesh pen 13 qazanda spiker retinde sailanǵan Kanatbek Isaevtyń otstavkaǵa ketýin talap etken.
Keiinirek úkimet úiiniń aldynda jaqtastarynyń aldynda sóilegen Sadyr Japarov Jogorký Keńesh spikeriniń memleket basshysy mindetin atqarýdan bas tartqanyn, prezident ókileti ózine ótkenin málimdegen.
Bishkekte 5 qazannan beri narazylyq aktsiiasy toqtaǵan joq. "Aq úidi" basyp alyp, Sadyr Japarovty qamaýdan shyǵarǵannan keiin jastastary ony premer-ministr retinde taǵaiyndaýdy talap etken. 14 qazanda parlament Sadyr Japarov jetekshiligindegi úkimet quramyn maquldap, keiinirek prezident bekitken. Budan soń Jeenbekov parlament sailaýy ótkennen keiin otstavkaǵa ketýge daiyn ekenin málimdegen. Alaida Japarov jaqtastary onyń dereý otstavkasyn talap etken edi.
