7 tamyz kúni Qyrǵyzstannyń burynǵy prezidenti Almazbek Atambaevtyń úiinde bolǵan oqiǵalardan keiin búgin Qyrǵyzstan Bas prokýratýrasy «Jappai tártipsizdikter», «Buzaqylyq», «Adam óltirý», «Adamdy kepilge alý» baptarymen sotqa deiingi tergeý amaldaryn bastaǵanyn málimdedi, dep habarlaidy «QazAqparat».
Aita keteiik, búgin Qyrǵyzstanǵa 9 tamyz kúni Sholpan atada bolatyn EAEO elderiniń úkimet basshylary kezdesýine resmi delegatsiialar keledi. «Eldegi oqiǵalarǵa qaramastan, Eýraziia úkimetaralyq keńesi belgilengen ýaqytynda ótedi», - dep málimdedi Qyrǵyz Respýblikasy premer-ministriniń baspasóz hatshysy Ádilet Sultanaliev.
Atambaevty arnaiy ustaý sharasy Ystyqkóldegi týrizm maýsymynan qyzǵan shaǵynda iske asyrylýda. Osyǵan orai Qyrǵyzstan týrizm departamentiniń direktory Maksat Damir ýýlý týroperatorlarǵa úndeý tastady:
«Eger sizderde Bishkek aýmaǵynda qaýipsizdigin qamtamasyz etý qajet týrister toby bolsa, maǵan habarlasyńyzdar... Jol qozǵalysy qaýipsizdigin qamtamasyz etý bas barqarmasymen birge ony uiymdastyrýǵa áreket jasaimyz», - dedi ol.
Bishkek ishki ister bas basqarmasynyń málimdeýinshe, Bishkek militsiiasynyń jeke quramy azamattar men astana qonaqtarynyń qoǵamdyq qaýipsizdigin qamtamasyz etý qyzmetin shtattyq rejimde oryndap otyr. Qazirgi kezde qaladaǵy jaǵdai qalypty, militsiia qyzmetkerleriniń baqylaýynda.
