Illiýstratsiia: knews.kg
12 sáýir kúni keshke Qyrǵyzstan men Tájikstan shekarasynda taǵy qarýly qaqtyǵys boldy, - dep habarlaidy Tengrinews.kz tilshisi.
Qyrǵyzstan UQK Shekara qyzmeti baspasóz ortalyǵynyń málimetinshe, oqiǵa Qyrǵyzstan shekara otriady qyzmet atqaryp jatqan Batken oblysy Leilek aýdany Selkan aýdanynda bolǵan.
"Kórshiles aýmaqta júrgen tájik shekarashylary qyrǵyz áskeri qyzmetshilerin kórip, Memlekettik shekaranyń shartty syzyǵyna qarai jylji bastady. Qyrǵyz shekarashylarynyń shekara syzyǵynan ótpeý, óz aýmaǵyna qarai ketý týraly talaptaryn Tájikstannyń shekara jasaǵy elemei shekaradan ótip, Qyrǵyzstan aýmaǵyna 20 metrge kirip aldy. Tájik shekarashylarynyń aýmaqqa ótýine jol bermeý maqsatynda QR UQKU QS shekara jasaǵy áýege eskertý oq jaýdyrdy", - dep habarlady vedomstvonyń baspasóz qyzmeti.
Tájikstan shekarashylary jaýap retinde qyrǵyz shekarashylaryna oq jaýdyrǵan. Bul qaqtyǵystyń nátijesinde qyrǵyz tarapynan jaralanǵandar men zardap shekkender joq.
Alaida ekinshi bolǵan atystan qyrǵyz sarbazy jaralandy. Sondai-aq eki tájik áskeri qyzmetkeriniń jaralanǵany habarlandy.
"Saǵat 21:17 shamasynda oqiǵa ornyna kelgen Qyrǵyzstan men Tájikstan shekara ókilderi arasyndaǵy kelissózder barysynda Tájikstan shekarashylary qaitadan Qyrǵyzstan UQK ShQ áskeri qyzmetshilerine oq jaýdyrdy. Qaita atys bastaldy, ol shamamen 30 minýtqa sozyldy. Jaralanǵandar bar", - dep habarlady QR UQK Shekara qyzmeti.
Atys jergilikti ýaqyt boiynsha 22:15-te toqtaǵany atap ótildi.
Qaqtyǵys aimaǵynan Maqsat, Arqa, Borbordýk, Jashtyq jáne Dostyk aýyldarynyń turǵyndary evakýatsiialandy.
Qyrǵyzstan shekara qyzmeti ókiliniń aitýynsha, memlekettik shekaranyń qyrǵyz-tájik ýchaskesindegi jaǵdai salystyrmaly túrde turaqty, biraq arasynda shielenisip turady.
