Qyrǵyz-tájik shekarasynda bolǵan janjaldan Qyrǵyzstannyń alty azamaty, Tájikstannyń úsh azamaty jaralandy, dep habarlady jergilikti bilik pen dárigerler.
Qyrǵyzstannyń shekara qyzmetiniń habarlaýynsha, 18 jeltoqsanda Qyrǵyzstannyń Batken oblysynda bolǵan janjal kezinde tórt shekarashy, bir depýtat jáne bir turǵyn jaralanǵan. Ekeýine oq tigen.
Tájikstannyń Isfar qalasyndaǵy aýrýhana qyzmetkeri Azattyqqa Tájikstannyń úsh azamaty: 14 jastaǵy Ýmedjon Safarov, 23 jastaǵy Asrorhon Asadzoda jáne 59 jastaǵy Sodikboi Nabievtiń jaralanǵanyn aitty. Tájik biligi oqiǵaǵa bailanysty resmi túrde málimdeme jasamady.
Sovet Odaǵy 1991 jyly qulaǵaly beri Ortalyq Aziiadaǵy keibir memleketter shekara máselesin sheshe almai keledi. Ásirese, Tájikstan, Ózbekstan men Qyrǵyzstanǵa ortaq Ferǵana ańǵary boiyndaǵy aýmaqtyń daýly tustary kóp. Qyrǵyz-tájik shekarasynyń jalpy uzyndyǵy – 970 shaqyrym. Qazirge deiin 504 kilometrine bailanysty delimitatsiia jáne demarkatsiia jumystary júrgizilgen. Al shekaranyń kelisilmegen tustary sondaǵy eldi mekenderdegi sý, jer jáne áli anyqtalmaǵan shekarany kesip ótý máseleleri daýǵa jii sebep bolady. Daýdyń sońy janjalǵa ulasyp, taraptar bir-birine tas atady, keide qarýdan oq atady.
Qańtar aiynan beri qyrǵyz-tájik shekarasynda keminde on janjal bolǵan. Tórt jaǵdaida adam ólgen. Qyrkúiek aiynda bolǵan qaqtyǵystan birneshe adam qaza tapty.
