Tájikstan men Qyrǵyzstan bir-birin "áskeri agressiia jasady" dep taǵy da aiyptady. Eki el biligi shekaradaǵy qaqtyǵys kezinde ólgen adamdary týraly jańa málimetterin jariialady, dep habarlaidy Azattyq.
Qyrǵyzstannyń densaýlyq saqtaý ministrligi 18 qyrkúiektegi málimetter boiynsha Batken aýrýhanasyna taǵy 13 adamnyń denesi jetkizilgenin málimdedi. Osylaisha qaqtyǵys qurbandary 59 adamǵa jetken, onyń ishinde 15 jasar qyz da bar.
144 adam jaralanyp, aýrýhanaǵa túsken. Olardyń kóbi Bishkek pen Oshtyń aýrýhanalaryna jetkizilgen. Resmi habarǵa qaraǵanda, qaýipti aimaqtan 140 myń adam kóshirilgen.
18 qyrkúiekte Tájikstan syrtqy ister ministrligi Tájikstannyń 32 adamy óldi, onyń kópshiligi - beibit turǵyndar dep jariialady. Buǵan deiin Azattyqtyń Tájik redaktsiiasy — Radio "Ozodi" 14-16 qyrkúiektegi qaqtyǵys kezinde Tájikstannyń 39 azamaty ólgenin habarlaǵan. Bul málimetterdi ózge táýelsiz derekkózderden anyqtaý múmkin bolmai tur.
Qyrǵyzstan syrtqy ister ministrligi "Qyrǵyzstan qarýly kúshteri tek qana qorǵanǵanyn" málimdedi.
16 qyrkúiekte Qyrǵyzstan men Tájikstan shekarasynda iri qaqtyǵys bolǵan. Eki tarap "janjal bastady" dep birin-biri aiyptaǵan. Qaqtyǵys kezinde birneshe ret kelissóz júrip, eki tarap oq atýdy toqtatýǵa ýaǵdalasqanymen shekaradaǵy atys qaita jalǵasa bergen. Qyrǵyzstannyń Batken oblysynda tótenshe jaǵdai jariialanǵan.
Qyrǵyzstan 19 qyrkúiekti Ulttyq aza kúni dep jariialady.
Qyrǵyz-tájik qaqtyǵysy 14 qyrkúiekte Tájikstannyń Isfara jáne Bobodjon Gafýrov aýdandary men Qyrǵyzstannyń Batken oblysy shektesken tusta bastalyp, kóp uzamai Tájikstannyń Lahsh aýdany men Qyrǵyzstannyń Osh oblysy arasyndaǵy shekaraǵa ulasqan.
Qyrǵyzstan men Tájikstan arasyndaǵy 970 shaqyrym shekaranyń basym bóligi áli kúnge naqty belgilenbegen. Osyǵan bailanysty eki el halqy men shekarashylary arasynda sý men jerge bailanysty jii qaqtyǵysyp keledi.
