Qyrǵyzstan prezidenti Sooronbai Jeenbekov bilikte otbasylyq-klandyq basqarýǵa jol bermeitinin málimdedi, dep jazady qyrǵyz prezidentiniń resmi saity.
"Otbasylyq basqarýǵa qarsy kúrestiń bastaýynda turǵan adam retinde men bilikte klandyq júie ornatýǵa jol bermeimin!", — dedi Jeenbekov Ystyqkól oblysy Ton aýdanynyń turǵyndarymen kezdesý barysynda.
"2010 jyly otbasylyq-klandyq rejimge qarsy shyǵyp, sol jolda qaza tapqan otandastarymdy men de umytqan joqpyn, bul men úshin de aýyr qaiǵy. Sol sebepti de men bul taqyryp tóńireginde saiasi spekýliatsiiaǵa jol bermeimin! Halyq sailaǵan prezident retinde elde otbasylyq-klandyq basqarýǵa jol bermeimin!, — dep málimdedi qyrǵyz basshysy.
Jeenbekov otbasylyq basqarý týraly sóz qozǵaityndar bir mańyzdy faktor – qoǵam sanasyndaǵy ózgeristerdi eskermeitinin atap ótti.
"Bizdiń basty jetistigimiz – myqty azamattyq qoǵam. Ashyq qoǵamda otbasylyq nemese klandyq basqarý júiesin ornatý múmkin emes. Meniń prezident laýazymyndaǵy memlekettik qyzmetime jaqyndarymnyń eshqaisysy yqpalyn tigize almaidy", — dedi memleket basshysy.
Aita ketsek, qyrǵyz prezidenti eki kúndik jumys saparymen Ystyqkól oblysynda júr. Sapar aiasynda Jeenbekov Ton aýdanynyń turǵyndarymen kezdesti.
