Qyrǵyzstannyń Jogorgý Keneshiniń depýtattary eldiń burynǵy prezidenti Almazbek Atambaevty tiispeýshilik mártebesinen aiyrýdy usyndy. Bul týraly kabar agenttigi habarlady.
Almazbek Atambaevty eshkimniń tiispeýi jónindegi quqyǵynan aiyrý bastamasyn kóterip júrgen Jogorgý Keneshtiń depýtattary qandai faktiler boiynsha aiyp taqqysy keletinderin aitty. Osy másele qaralǵan depýtattyq komissiiada tiisti hatty depýtat Talant Mamytov oqydy.
Talant Mamytov óz sózinde Atambaev Premer-ministr bolǵan kezinde Reseidiń 123 azamatyna qarý bergenin, ol azamattardyń ishinde uiymdasqan qylmystyq top músheleri bolǵanyn aitady.
Onyń aitýynsha, «TNK Dastan» kompaniiasynyń jeke laýazymdy tulǵalarynyń kómegimen ol Qoi Tash aýylyndaǵy jer ýchaskesin zańsyz iemdengen. Sol jerde úi salǵan.
Depýtattar sonymen qatar qylmys áleminde abyroiy bar Áziz Batýkaevty zańsyz bosatyp alǵany úshin Almazbek Atambaevqa aiyp taqqaly otyr.
Sonymen qatar, Atambaev Premer-ministr kezinde Úkimettiń qaýlysymen Alamedin aýdany Báitik aýylyndaǵy 35,65 gektar jerdi kottedj qalashyǵyn salý úshin aýyl sharýashylyǵy mańyzyndaǵy jerden turǵylyqty eldimeken sanatyna aýystyrǵan.
Atambaevtyń 2010-2018 jylǵy Biryńǵai salyqtyq deklaratsiiasyn zertteý kezinde anyqtalǵanyndai, 2017 jylǵy deklaratsiiada jalpy aýmaǵy 54 mln somdyq S.Pahatidiń kirisi bary anyqtalǵan. Iaǵni, 2017 jyly Pahati Atambaevtan OsOO NPF «Forým»-dy alǵan. Depýtattardyń boljaýynsha, atalǵan azamat ortaq úlestegi adam bolyp otyr.
Ystyqkól aýdandyq ákimshiligi men Chon-Saroi aýyl okmýtynyń zańǵa qarsy áreketiniń saldarynan Chon-Sary oi aýylyndaǵy jalpy aýmaǵy 4,61 gektar jer aýmaǵy memleket qajettiligimen bailanysy joq OsOO «Frýnze Rezert»-ke berilgen. Keiin jer ýchaskesi eki bólikke bólinip, Almazbek Atambaevtyń ieligine berilgen.
Sonymen qatar, Bas prokýratýra Bishkek JEO jańǵyrtý boiynsha jobanyń daiarlyǵy men oǵan qol qoiý kezinde jemqorlyq faktisi boiynsha qylmystyq is qozǵady. Depýtattardyń aitýynsha, Atambaevtyń málimdemesi sol qylmysqa qatysy baryn dáleldei túsedi. Atap aitqanda, barlyq saiasi sheshim, sondai-aq, kompaniiany tańdaý kezindegi kelisimniń bárin Atambaevtyń ózi qabyldaǵan.
Depýtattar sol sekildi burynǵy Bas prokýror Aida Salianovanyń Almazbek Atambaev Bishkek JEO-ǵa zańsyz kómir tasylýyna qatysty qylmystyq is qozǵalǵanyn jariia etkenin eske saldy.
Sondai-aq, eks-prezidentke "bilikti ozbyrlyqpen basyp aldy" degen aiyp taǵylýda. Depýtattardyń paiymdaýynsha, ol uiymdasqan qylmystyq top quryp, bilik organdarynyń jumysyna aralasyp otyrǵan.
Aita keteiik, 12 maýsymda parlamenttegi "Qyrǵyzstan" fraktsiiasynyń jetekshisi, depýtat Kanatbek Isaev burynǵy prezident Almazbek Atambaevty tiispeýshilik mártebesinen aiyrý týraly bastama kótergen. Ol bul bastamany 60 depýtat qoldaitynyn jáne osynyń negizinde komissiia qurýǵa bolatynyn aitqan. Isaev pen taǵy bir depýtat Talant Mamytov Atambaevty "bilikti zańsyz iemdenip almaq boldy" dep aiyptaǵan edi.
13 maýsymda quramyna parlament depýtattary Kanybek Imanaliev, Omýrbek Bakirov, Evgeniia Strokova, Kojobek Ryspaev, Maksatbek Egemberdiev, Talant Mamytov, Baktybek Raiymkýlov, Jyrgalbek Týrýskýlov, Altynbek Jýnýsýýlý, Baktybek Týrýsbekov, Kanatbek Isaev jáne Almazbek Toktorov engen komissiia quryldy.
16 mamyrda Qyrǵyzstan prezidenti Sooronbai Jeenbekov "Qyrǵyzstan prezidentiniń qyzmetine kepildik berý týraly" zańǵa ózgerister engizý týraly zańǵa qol qoidy.
Onda Jogorký keńesh qylmysqa qatysy bar degen aiyp taǵyp, ony bas prokýratýra rastaǵan jaǵdaida burynǵy prezidentti tiispeýshilik mártebesinen aiyrý qarastyrylǵan. Sondai-aq, zań jobasynyń 11-babyna sáikes, burynǵy prezidenttiń memlekettik bilik organdarynda saiasi, arnaýly memlekettik laýazym atqarýyna, saiasi partiialarda basshylyq qyzmet isteýine nemese onyń qyzmetine aralasýyna tyiym salynady.
Qyrǵyzstanda burynǵy prezident mártebesine Roza Otýnbaeva men Almazbek Atambaev ie. Al halyq tolqýlary nátijesinde bilikten ketýge májbúr bolǵan eldiń birinshi prezidenti Asqar Aqaev pen ekinshi prezidenti Qurmanbek Bakievke ondai mártebe berilmegen.
