Qyrǵyzstannyń shekara qyzmeti Osh oblysy Chon-Alai aýdany Ýnjý-Býlak eldi mekenine jaqyn qyrǵyz-tájik shekarasyndaǵy jaǵdai ýshyqqanyn habarlady.
Shekara qyzmetiniń túsindirýinshe, tájik taraby "qyrǵyz-tájik shekarasynda delimitatsiia jáne demarkatsiia júrgizý máselesi boiynsha úkimetaralyq delegatsiia arasynda jasalǵan barlyq kelisimdi" buzǵyp, qyrǵyz jaǵyna qarai bir shaqyrym jyljyp, konteinerler ornatqan. Jaǵdai sol sebepti ýshyqqan. Tájik jaǵy oqiǵa ornyna ásker men áskeri tehnika da ákelgen.
"Qyrǵyz jaǵy eki taraptyń shekara qyzmeti deńgeiinde jaǵdaidy retteý úshin shara qoldanýǵa tyrysyp jatyr. Alaida Tájikstannyń shekara ókilderi telefondaryn almaidy. Aýmaqqa ákelingen Qyrǵyzstannyń ulttyq qaýipsizdik jónindegi memlekettik komitetiniń shekara qyzmeti bólimsheleri kúsheitilgen rejimge kóshti" delingen baspasóz qyzmeti jariialaǵan habarlamada.
Tájikstan taraby ázirge oqiǵaǵa túsinikteme bermedi.
Qyrǵyz-tájik shekarasynyń jalpy uzyndyǵy – 970 shaqyrym. Qazirge deiin 504 kilometrine delimitatsiia jáne demarkatsiia júrgizilgen.
Al shekaranyń kelisilmegen tustary sondaǵy eldi mekenderdegi sý, jer jáne áli anyqtalmaǵan shekarany kesip ótý máseleleri daýǵa jii sebep bolady. Daýdyń sońy janjalǵa ulasyp, taraptar bir-birine tas atady, keide qarýdan oq atady.
28-30 sáýirde qyrǵyz-tájik shekarasynda bolǵan janjaldan 50-den astam adam qaza bolǵan, júzdegen adam zardap shekken. (Qyrǵyz jaǵy 36 qyrǵyz azamaty, tájik taraby 19 adamnyń opat bolǵanyn habarlady). Eki jaq bir-birin jaǵdaidy ýshyqtyrdy dep aiyptap, qylmystyq ister qozǵaǵan.
