QR Densaýlyq saqtaý ministri Aleksei Tsoi saladaǵy Ulttyq joba týraly aitty, dep habarlaidy QazAqparat.
«Memleket basshysynyń 2020 jylǵy 1 qyrkúiektegi Qazaqstan halqyna Joldaýynda bergen tapsyrmalaryn iske asyrý aiasynda biz Qazaqstan Respýblikasynyń densaýlyq saqtaý salasyn damytýdyń 2020-2025 jyldarǵa arnalǵan memlekettik baǵdarlamasyn Ulttyq jobaǵa kóshirý boiynsha jumysty bastadyq. Ulttyq jobanyń negizgi baǵyttary: «Densaýlyq saqtaýdy damytý», «Epidemiologiialyq boljaý men oǵan den qoiýdyń qazirgi zamanǵy júiesin qalyptastyrý», «Qazaqstannyń otandyq farmatsevtikalyq ónerkásibin qalyptastyrý», «Buqaralyq sportty damytý». Ulttyq jobanyń negizgi ulttyq indikatory 2025 jyly kútiletin ómir súrý uzaqtyǵynyń 75 jasqa deiin ulǵaiýy bolyp otyr», - dedi ministr halyq aldynda esep berý kezdesýinde.
«Deni saý ult» Ulttyq jobasyn iske asyrý nátijesinde myna nátijeler eskerilip otyr:
- barlyq kózderden kelip túsetin densaýlyq saqtaýdy qarjylandyrý kólemin eldegi JIÓ-niń 5% -ǵa deiin ulǵaitý;
- ekstrakorporaldyq uryqtandyrýdy júrgizýge jyl saiyn 7 myń kvota bólý;
- óńirlerde 20 qazirgi zamanǵy meditsinalyq ortalyq salý;
- aýyldyq eldi mekenderde 137 feldsherlik-akýsherlik, meditsinalyq pýnktter men dárigerlik ambýlatoriialar ashý;
- MÁMS qarajaty esebinen árbir azamat úshin qymbat turatyn meditsinalyq qyzmetterdiń qoljetimdiligin qamtamasyz etý;
- dárigerlerdiń ortasha jalaqysyn ekonomikadaǵy ortasha jalaqydan 2,5 esege ulǵaitý;
- otandyq óndiristiń dárilik zattary men meditsinalyq buiymdarynyń úlesin 50% - ǵa deiin (qundyq máninde) ulǵaitý.
