قر دەنساۋلىق ساقتاۋ مينيسترٸ الەكسەي تسوي سالاداعى ۇلتتىق جوبا تۋرالى ايتتى, دەپ حابارلايدى قازاقپارات.
«مەملەكەت باسشىسىنىڭ 2020 جىلعى 1 قىركٷيەكتەگٸ قازاقستان حالقىنا جولداۋىندا بەرگەن تاپسىرمالارىن ٸسكە اسىرۋ اياسىندا بٸز قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋدىڭ 2020-2025 جىلدارعا ارنالعان مەملەكەتتٸك باعدارلاماسىن ۇلتتىق جوباعا كٶشٸرۋ بويىنشا جۇمىستى باستادىق. ۇلتتىق جوبانىڭ نەگٸزگٸ باعىتتارى: «دەنساۋلىق ساقتاۋدى دامىتۋ», «ەپيدەميولوگييالىق بولجاۋ مەن وعان دەن قويۋدىڭ قازٸرگٸ زامانعى جٷيەسٸن قالىپتاستىرۋ», «قازاقستاننىڭ وتاندىق فارماتسەۆتيكالىق ٶنەركەسٸبٸن قالىپتاستىرۋ», «بۇقارالىق سپورتتى دامىتۋ». ۇلتتىق جوبانىڭ نەگٸزگٸ ۇلتتىق ينديكاتورى 2025 جىلى كٷتٸلەتٸن ٶمٸر سٷرۋ ۇزاقتىعىنىڭ 75 جاسقا دەيٸن ۇلعايۋى بولىپ وتىر», - دەدٸ مينيستر حالىق الدىندا ەسەپ بەرۋ كەزدەسۋٸندە.
«دەنٸ ساۋ ۇلت» ۇلتتىق جوباسىن ٸسكە اسىرۋ نەتيجەسٸندە مىنا نەتيجەلەر ەسكەرٸلٸپ وتىر:
- بارلىق كٶزدەردەن كەلٸپ تٷسەتٸن دەنساۋلىق ساقتاۋدى قارجىلاندىرۋ كٶلەمٸن ەلدەگٸ جٸٶ-نٸڭ 5% -عا دەيٸن ۇلعايتۋ;
- ەكستراكورپورالدىق ۇرىقتاندىرۋدى جٷرگٸزۋگە جىل سايىن 7 مىڭ كۆوتا بٶلۋ;
- ٶڭٸرلەردە 20 قازٸرگٸ زامانعى مەديتسينالىق ورتالىق سالۋ;
- اۋىلدىق ەلدٸ مەكەندەردە 137 فەلدشەرلٸك-اكۋشەرلٸك, مەديتسينالىق پۋنكتتەر مەن دەرٸگەرلٸك امبۋلاتورييالار اشۋ;
- مەمس قاراجاتى ەسەبٸنەن ەربٸر ازامات ٷشٸن قىمبات تۇراتىن مەديتسينالىق قىزمەتتەردٸڭ قولجەتٸمدٸلٸگٸن قامتاماسىز ەتۋ;
- دەرٸگەرلەردٸڭ ورتاشا جالاقىسىن ەكونوميكاداعى ورتاشا جالاقىدان 2,5 ەسەگە ۇلعايتۋ;
- وتاندىق ٶندٸرٸستٸڭ دەرٸلٸك زاتتارى مەن مەديتسينالىق بۇيىمدارىنىڭ ٷلەسٸن 50% - عا دەيٸن (قۇندىق مەنٸندە) ۇلعايتۋ.
