Qyzylordada túrmeden bosap shyqqan adam sybailasymen birge bótenniń kóligin urlap, ony keiinnen órtep jibergen, dep habarlaidy QazAqparat.
Oblystyq Politsiia departamenti oqiǵa jaiynda túsinik berdi.
Vedomstvo málimetinshe, 21 qarashada Qyzylorda qalalyq Politsiia basqarmasynyń kezekshi bólimine jergilikti turǵyn aryzdandy.
Belgili bolǵandai, keshki ýaqytta qala ortalyǵyndaǵy kóshelerdiń birinde turǵyndy uryp-soǵyp, onyń «Opel Vectra» markaly avtokóligin belgisiz adamdar urlap ketken. Ony keiinnen órtep jibergen. Keltirilgen materialdyq shyǵyn - 1 500 000 teńge. Kóp uzamai Qyzylorda qalalyq Politsiia basqarmasynyń qyzmetkerleri eki kúdiktini ustady. Oqiǵanyń mán-jaiy anyqtalýda.
«Kúdiktilerdiń biri uiymdasqan qylmystyq toptyń belsendisi ekendigi anyqtaldy. Ol buryn qylmystyq jaýapkershilikke tartylyp, birneshe qylmysy úshin sotty bolǵan. 2015 jyly QR Qylmystyq kodeksiniń 296-babynyń 4-bóligimen 6 jylǵa sottalǵan. Qazirgi tańda kúdiktilerdiń ústinen QR Qylmystyq kodeksiniń 200-baby 2-bóliginiń 1,3-tarmaqtarymen jáne 202-baby 2-bóliginiń 1-tarmaǵymen sotqa deiingi tergep-tekserý amaldary bastaldy. Eki kúdikti qazirgi tańda basqarmanyń ýaqytsha ustaý izoliatoryna qamaýǵa alyndy», - dep málim etti Qyzylorda oblystyq Politsiia departamentinen.
