Qazaqstan Respýblikasynyń Prezidenti N.Nazarbaev 2018 jyldyń 19 aqpandaǵy «Qazaq tili álipbiin kirillitsadan latyn grafikasyna kóshirý týraly» qaýlysymen jańa latyn álipbiin bekitken bolatyn. Osyǵan orai Qylmystyq-atqarý júiesi komitetinde de jańa latyn álipbiin meńgerýge baǵyttalǵan san-salaly is-sharalar júzege asyrylýda. Osyǵan orai Qazaqstan Respýblikasy Ishki ister ministrliginiń 2018 jylǵy 4 sáýirdegi buiryǵymen elimizdiń ishki ister organdarynda qazaq tilin latyn álipbiine kóshirý maqsatynda arnaiy sabaqtar uiymdastyrylýda.
Qylmystyq-atqarý júiesiniń Almaty qalasy boiynsha departamentinde de QR Úkimetiniń janyndaǵy Qazaq tili álipbiin latyn grafikasyna kóshirý jónindegi ulttyq komissiiasy maquldaǵan «Jańa álipbi negizindegi qazaq tili emlesiniń erejeleri» oqytylýda. Jańa álipbidi oqytý barysynda kórneki qural retinde úlken tablitsa arqyly túsindirilip, sondai-aq ár qatysqan qyzmetkerge jańa álipbi nusqasy taratyldy.
«Latyn álipbiin meńgerýde A.Baitursynuly atyndaǵy Til bilimi institýtynyń filolog ǵalymdary ázirlegen latyn negizdi álipbige qatysty emle qoldanylýda. Atalǵan emle Memleket basshysynyń 2018 jylǵy 19 aqpandaǵy qaýlysymen bekitilgen. Árine jańa áripterdiń jazý nusqasyna qatysty úirenýshiler tarapynan qoiylatyn suraqtar da kóp. Olardyń jazý barysyndaǵy uqsastyqtary, qalai tańbalap jazylatyndyǵy jaily sabaq barysynda jan-jaqty túsindiriledi» - deidi latyn álipbiin meńgerýden arnaiy sabaq beretin tájiribeli ustaz Zakira Kókenova.
«Mysaly shettildik sózder sońyndaǵy b, g, d dybystary p, k, t áripterimen jazylady: arap, shtap, dramatýrk, hirýrk, pedagok, analok, brent, asteroit. Bul emle burynǵy keńes dáýirinen qalyptasqan kirilnegizdi álipbidegi emlege qarama-qaishylyq týdyrady: arab, shtab, dramatýrg, hirýrg, pedagog, analog, brend, asteroid – degen jáne de basqa da sózderdegi kirme sózderdiń jazylýy men fonetikalyq turǵysynan aitylýy boiynsha latynnegizdi álipbi boiynsha, qalai estiledi, solai jazylatyndai bolyp tur. Jańa mazmundy Orfografiia erejeleriniń túzilýi aldynda A.Baitursynuly atyndaǵy Til bilimi institýtynyń orfograf-mamandary «halyqtyń sóileý tilimen sanasý kerek» (A.Baitursynuly), «emle negizine qoja sol tildiń jaratylys zańy bolýǵa kerek» (Q.Jubanov) degen ulaǵatty tujyrym-pikirlerdi basshylyqqa aldy».
