Turǵyndar ótinishin Qylmystyq-atqarý júiesi komitetine WhatsApp-taǵy arnaiy jeli arqyly jibere alady, dep habarlaidy "Ult aqparat" QR IIM QAJ komitetiniń baspasóz qyzmetine silteme jasap.
«Senim telefony, elektrondyq úkimet portalyndaǵy tóraǵa blogy siiaqty jumys istep júrgen keri bailanys quraldaryna qosymsha retinde azamattarmen kommýnikatsiianyń taǵy bir arnasy ashyldy. Endi QAJ tarapyna buzýshylyqtarǵa tap bolatyn árbir azamat habarlama jibere alady. Osyndai bailanys bas bostandyǵynan aiyrý oryndarynda otyrǵandardyń quqyǵynyń qorǵalýy men saqtalýyn qamtamasyz etý tártibin jetildirýge múmkindik beredi», - dep atap ótti QAJK basshysy Janat Eshmaǵambetov.
Bul úshin tanymal WhatsApp messendjerinde jedel jeliniń 8-776-677-80-77 nómirine habarlama nemese mediafail jiberý jetkilikti. Oǵan jaýap ta messendjerde beriledi.
«Biz keri bailanystyń bul túri barlyq quqyq buzýshylyqtar boiynsha ótinishter men shaǵymdardyń qabyldanýy men qaralýyn jeńildetedi dep sanaimyz. Bul jumysty baqylap, kelip túsken habarlamalardy onlain rejimde taldap otyratyn jáne olardy jaýap daiyndaý úshin komitettiń beiindi qyzmetterine joldaityn operator qyzmet atqarady. Birde bir habarlama jaýapsyz qalmaidy. Azamattardyń shaǵymdary obektivti ári jan jaqty qaraý maqsatynda buǵan bas bostandyǵynan aiyrý oryndarynda qoǵamdyq baqylaý júrgizetin múddeli organdar men olardyń ókilderi tartylady», - dep qosyp ótti QAJK tóraǵasy.
