Pedagogika, meditsina, veterinariia jáne aýyl sharýashylyǵy mamandyqtary boiynsha kvotamen bilim alǵan aýyl jastary kolledj nemese ýniversitetti aiaqtaǵannan keiin úsh jyl aýylda jumys isteýge mindetti. Tiisti Qaýlyǵa Úkimet basshysy Asqar Mamin qol qoidy, dep habarlaidy "Ult aqparat".
Qaýlyǵa sáikes, «Mamandy jumysqa jiberý, óz betimen jumysqa ornalasý quqyǵyn berý, memlekettik bilim berý tapsyrysy negizinde bilim alǵan azamattardy jumysyn óteý jónindegi mindetinen bosatý nemese olardyń mindetin toqtatý qaǵidalaryn bekitý týraly» QR Úkimetiniń 2012 jylǵy 30 naýryzdaǵy №390 qaýlysyna, sondai-aq «Bilim berý grantyn berý erejesin bekitý týraly» QR Úkimetiniń 2008 jylǵy 23 qańtardaǵy №58 qaýlysyna ózgerister men tolyqtyrýlar engizildi.
«Pedagogtik, meditsinalyq, veterinariialyq jáne aýyl sharýashylyǵy mamandyqtary boiynsha aýyl jastary qatarynan shyqqan azamattarǵa beriletin kvota sheginde oqýǵa túsken azamattar joǵary jáne (nemese) joǵary oqý ornynan keiingi bilim berý uiymyn bitirgennen keiin keminde úsh jyl aýyldyq jerde ornalasqan tiisinshe memlekettik bilim berý uiymdarynda, memlekettik meditsina uiymdarynda, veterinariia salasyndaǵy qyzmetti júzege asyratyn memlekettik organdar bólimshelerinde, memlekettik veterinariia uiymdarynda jáne menshik nysanyna qaramastan, agrarlyq beiindegi uiymdarda jumysyn óteidi», - delingen qujatta.
Sondai-aq úsh jyl aýylda jumys isteý jónindegi mindetke qatysty Qaýlynyń 28-tarmaǵyna ózgerister engizildi.
«28. Zańda kózdelgen jumysty óteý jónindegi mindet:
1) jumysty óteý jónindegi mindettiń oryndalýyna bailanysty;
2) tiisti qujattarmen rastalǵan, bilim alýshynyń (jas mamannyń, filosofiia doktorynyń (RhD)) qaitys bolýyna bailanysty;
3) jumysty óteý merzimi kezinde I jáne II top múgedektigi belgilengen jaǵdaida;
4) Zańda jáne osy Qaǵidalardyń 27-tarmaǵynda kózdelgen jaǵdailarda jumysty óteý jónindegi mindetinen bosatylýyna bailanysty biýdjet qarajaty esebinen jumsalǵan oqytýmen bailanysty shyǵystar qaitarylmai toqtatylady», - delingen onda.
Atalǵan Qaýly alǵash resmi jariialanǵan ýaqyttan 10 kúnnen soń qoldanysqa engiziledi.
