Biylǵy 26 sáýirden halyqty QazVac-pen vaktsinatsiialaý bastaldy. Osy 10 kúnge jýyq merzimde el óńirlerinde otandyq vaktsinany egý jumystary júrip jatyr.
Aita keteiik, 22 cáýir kúni COVID-19-ǵa qarsy qazaqstandyq QazVac (QazCovid-in) vaktsinasynyń alǵashqy partiiasy jóneltildi. QazVac vaktsinasynyń alǵashqy 50 myń dozasy «SQ-Farmatsiianyń» habtaryna taratylyp, odan ári elimizdiń barlyq óńirlerindegi densaýlyq saqtaý basqarmalarynyń qoimalaryna jetkizildi. Budan ári vaktsina óndirisi kezeń-kezeńmen aiyna 500-600 myń dozaǵa deiin ulǵaitylady.
Qazaqstandyq vaktsinanyń ǵylymi ataýy - QazCovid-in, onyń taýarlyq ataýy – QazVac.
«Vaktsinanyń alǵashqy partiiasy Biologiialyq qaýipsizdik máseleler jónindegi institýtta 50 myń dozamen óndirildi. Institýtymyz vaktsinany derbes óndirýge múmkindigi bar. Qazaqstanda óndirilgen dozalar barlyq óńirlerge jiberildi. Munan ary óndiristi ulǵaita túsý úshin túrli alańdardy qarastyryp jatyrmyz. Bul - túrik seriktesterimizdiń alańy. Sonymen Gvardeiskiide ózimizdiń zaýytty salý ústindemiz. Qazir ol munan ary iske qosý úshin qural-jabdyqtaryn ornatýdyń barlyq kezeńinen ótip jatyr», - dedi QR Densaýlyq saqtaý ministri Aleksei Tsoi tikelei efirde QazCOVID-in vaktsinasyn alǵannan keiin.
Sonymen qatar, mamyr aiynda 50 myń doza kólemindegi vaktsinanyń kezekti partiiasyn shyǵarý josparlanyp otyr. Osy oraida otandyq vaktsinanyń saldyrǵan azamattardyń pikirin kópshilik nazaryna usynýdy jón kórdik.
Búgin áleýmettik jelide Jer reformasy jónindegi komissiianyń múshesi, qoǵam qairatkeri Muhtar Taijan otandyq vaktsinany saldyrǵanyn jazdy.
«Men ózimizdiń Qazaqstandyq ǵalymdardy qoldaimyn jáne senemin! QazVac-ty salǵyzdym. Astanada Ábý-Dabi ǵimaratynda salyp jatyr, 2-shi qabatynda. Kezek joq, 10 min ishinde salyp jiberdi. Taǵy 30 min otyrasyń, ketesiń», - dedi M. Taijan.
Jambyl oblysy ákiminiń orynbasary Dáýlet Káribek te otandyq ǵalymdardyń ónimin ektirgenin málim etti.
«Búgin otandyq QazCovid-in (QazVac) vaktsinasyn saldyrdym. Bizdiń elimiz koronavirýsqa qarsy óz vaktsinasyn shyǵarǵan álemniń 5 eliniń biri boldy. Jambyl oblysy Qordai aýdanynda jasalǵan vaktsina qazirgi tańda elimizdiń barlyq óńirlerine jetkizildi. Biz bul aýrýdy tek jappai vaktsinatsiia júrgizý arqyly qana jeńemiz! Búginginiń batyry dárigerlerimizge shyn júrekten taǵy da alǵys aitqym keledi! El aman, jurt tynysh bolsyn!», - dep jazdy ákim orynbasary Facebook-tegi paraqshasynda.
Sonymen qatar Qyzylorda oblystyq ishki saiasat basqarmasynyń basshysy Mira Qazbekova otandyq vaktsinanyń tańdaǵanyn áleýmettik jelide jazdy.
«Otbasymdy oilaǵandyqtan «QazVac» vaktsinasyn saldyrdym. Qazir jaǵdaiym jaqsy, eshbir aýyrsyný belgileri bolǵan joq. Dárigerler úsh kúnge deiin densaýlyǵymdy baqylaýdy ustaityndyǵyn eskertti. Endi 21 kúnnen keiin vaktsinanyń ekinshi dozasyn saldyramyn. Bizdiń jumysymyz halyqpen tyǵyz bailanysty. Qyzmet babyna bailanysty túrli jerlerge baryp, adamdarmen jolyǵýǵa týra keledi. Sondyqtan indet juqtyrmaý úshin osyndai qadamǵa bardym. Úidegi úlkenderimiz de ekpe saldyrdy. Biz kásibi mamandarǵa senemiz. Ekpeden qorqýdyń qajeti joq dep sanaimyn. Óz densaýlyǵymyz úshin sheshim qabyldaýymyz qajet», - dedi M. Qazbekova.
Túrkistan oblysy Sozaq aýdany Shý aýyldyq okrýginiń ákimi Daniiar Dosymbekov otandyq ǵalymdardyń úlken jetistigi bolyp sanalatyn QazVac vaktsinasynyń birinshi komponentimen egilgenin aitty.
«Jalpy jaǵdaiym jaqsy, eshqandai keri áser bolǵan joq. Barshańyzdy óz otbasylaryńyzdy, jaqyndaryńyzdy qorǵaý úshin ekpe ektirýge shaqyramyn. Vaktsinatsiia indetti jeńýge septigin tigizetin birden-bir qural ekenin ǵylym men ýaqyt talai dáleldegen. Vaktsinatsalardyń tiimdiligi men qaýipsizdigi muqiiat baqylaý men tájiribeden ótkendigin atai otyryp, Qazaqstan halqyn immýndaýǵa Sizderdiń de atsalysýlaryńyz qajet ekendigin eske salǵym keledi», - dep jazdy ákim áleýmettik jelide.
Buǵan deiin habarlanǵandai, byltyr jazda QR Bilim jáne ǵylym ministri Ashat Aimaǵambetov, 2020 jyly jeltoqsan aiynda QR Prezidentiniń kómekshisi Erlan Karin, ótken jyldyń sońynda Jambyl oblysynyń ákimi Berdibek Saparbaev, S.J.Asfendiiarov atyndaǵy Qazaq ulttyq meditsinalyq ýniversitetiniń rektory Talǵat Nurǵojin otandyq vaktsinany saldyrǵan edi.
Al biyl 26 sáýirde Densaýlyq saqtaý ministrliginiń basshylyǵy otandyq vaktsinany ektirgen bolatyn.
Jaqynda elordadaǵy № 9 emhanada QR Sanitariialyq-epidemiologiialyq baqylaý komitetiniń basshysy Aijan Esmaǵambetova KVI-ǵa qarsy qazaqstandyq QazCovid-in (QazVac) vaktsinasyn saldyrdy.
«Ujymdyq immýnitetti qamtamasyz etý úshin bizde halyqtyń 60% vaktsinatsiialanýy kerek. Tek osylai ǵana virýstyń ainalymyn toqtatýǵa bolady», - dedi komitet basshysy.
Eske sala keteiik, aqpan aiynda táýekel tobyn qosa alǵanda túrli jas sanatyndaǵy 3 myń eriktige klinikalyq synaqtyń 3 satysy ótkizilip jatqany habarlanǵan edi.
Taiaýda Biologiialyq qaýipsizdik máseleleri jónindegi ǵylymi-zertteý institýtynyń bas direktory Kúnsulý Zakariia QazVac otandyq vaktsinasy klinikalyq synaǵynyń 3-satysy qashan aiaqtalatynyn aitty.
«Qazirgi ýaqytta dúniejúzinde klinikalyq synaqtyń 1, 2 jáne 3-satysynan ótip jatqan vaktsinalardy «kandidattyq vaktsinalar» dep ataidy. Olardyń sany 200-den asady. Sonyń ishinde bizdiń vaktsinamyz 14-shi bolyp klinikalyq zertteýge shyqty jáne álemde 5-shi bolyp adamdarǵa egýge ruqsat aldy», - dedi ǵalym.
Onyń aitýynsha, álemde ázirlenip, paidalanýǵa berilgen vaktsinalardyń eshqaisysy klinikalyq synaqtyń úshinshi satysynan ótpegen.
«Zertteýler áli jalǵasyp jatyr. Bireýleri klinikalyq synaqtyń 3-satysyna endi shyǵady. Mysaly, «Spýtnika V» osy jyldyń mamyr aiynda klinikalyq synaqtyń 3-satysynan tolyq ótedi. Al QazVac vaktsinamyzǵa osy jyldyń shilde aiynda klinikalyq synaqtyń 3-satysy aiaqtalady. Sol ýaqytta ózimizdiń zertteýlerdiń tolyq nátijesin alamyz», - dedi Kúnsulý Zakariia.
