Qazaqstanda búginnen bastap halyqty QazVac otandyq vaktsinasymen egý bastaldy. Osy oraida buǵan deiin otandyq vaktsinany erikti retinde alǵashqylardyń biri bolyp kimder alǵanyn eske salýdy jón kórdik, dep habarlaidy QazAqparat.
Biologiialyq qaýipsizdik problemalary ǵylymi-zertteý institýtynyń bas direktory Kúnsulý Zakariia koronavirýsqa qarsy qazaqstandyq vaktsinanyń ataýyna qatysty túsinikteme bergen bolatyn.
Qazaqstandyq vaktsinanyń ǵylymi ataýy - QazCovid-in, onyń saýdalyq ataýy – QazVac.
Atap aitqanda, byltyrdan bastap Qazaqstan azamattary óz erikterimen otandyq ǵalymdar ázirlegen koronavirýsqa qarsy vaktsinany tájiribe retinde saldyrǵan edi. Solardyń biri - saiasattanýshy Maqsat Jaqaý vaktsinatsiiadan ótkendigin aitqan bolatyn.
QazCovid-in qazaqstandyq vaktsinasyn erikti retinde byltyr QR Bilim jáne ǵylym ministri Ashat Aimaǵambetov te alǵan edi.
Sonymen qatar 2020 jyly jeltoqsan aiynda QR Prezidentiniń kómekshisi Erlan Karin otandyq preparatty saldyrdy. Al biyl 16 qańtarda vaktsinanyń ekinshi dozasyn ektirdi.
Budan bólek, ótken jyldyń sońynda Jambyl oblysynyń ákimi Berdibek Saparbaevqa qazaqstandyq QazCovid-in vaktsinasy egildi.
Aita keteiik,19 jeltoqsannan bastap Qazaqstan Respýblikasy Bilim jáne ǵylym ministrligi Ǵylym komiteti Biologiialyq qaýipsizdik problemalary ǵylymi-zertteý institýtynyń ǵalymdary ázirlegen QazCovid-in vaktsinasyn klinikalyq synaýdyń úshinshi kezeńi bastaldy.
Munymen qosa, 2020 jyldyń jeltoqsanynda S.J.Asfendiiarov atyndaǵy Qazaq ulttyq meditsinalyq ýniversitetiniń rektory Talǵat Nurǵojin de otandyq vaktsinany saldyrdy.
Al búgin, 26 sáýirde halyqty QazVac vaktsinasymen egý resmi túrde bastaldy. Otandyq preparatty alǵashqylardyń biri bolyp Densaýlyq saqtaý ministri Aleksei Tsoi aldy.
Eske sala keteiik, aqpan aiynda táýekel tobyn qosa alǵanda túrli jas sanatyndaǵy 3 myń eriktige klinikalyq synaqtyń III satysy ótkizilip jatqany habarlanǵan edi.
Búginge deiin qazaqstandyqtar koronavirýsqa qarsy reseilik «Spýtnik-V» vaktsinasymen egilgen bolatyn. QR Densaýlyq saqtaý ministrliginiń málimetinshe, 26 sáýirge deiin barlyǵy 893 633 adam ekpe saldyrdy.
