Densaýlyq saqtaý ministri Aleksei Tsoi Qazaqstanda koronavirýs infektsiiasyn juqtyrýdyń jaǵdailaryn tirkeý boiynsha jańa statistikasynyń artyqshylyqtaryn atady, dep habarlaidy QazAqparat.
«Biz Dúniejúzilik densaýlyq saqtaý uiymynyń Eýropa boiynsha aimaqtyq biýrosymen birqatar tehnikalyq konsýltatsiia ótkizip, aýrýlardyń kodtarynyń jańa halyqaralyq jiktelýi boiynsha COVID-19 jaǵdailaryn kodtaýǵa jáne esepke alýǵa kóshtik. 1 tamyzdan bastap zerthanalyq rastalǵan COVID-19 jaǵdailary, sonyń ishinde PTR teris nátijesi bar pnevmoniia jaǵdailary biriktirildi. Bul neni bildiredi? Koronavirýs jaǵdailaryn kodtaý algoritmine sáikes, biz qazir U07.1 kodyn rastalǵan jaǵdailar úshin, al U07.2 kodyn rastalmaǵan nemese yqtimal jaǵdailar kezdeskende qoldanamyz. Bul degenimiz, birinshi jáne ekinshi kodtary bar patsientter COVID-19 aýrýyna shaldyqqan adam retinde tirkeletinin bildiredi», - dedi Aleksei Tsoi OKQ-da ótken baspasóz máslihatynda.
Ministrdiń aitýynsha, birinshi kodtyń anyqtamasy óte aiqyn.
«Biraq U07.2 kody bolǵan jaǵdaida koronavirýs infektsiiasy epidemiologiialyq belgilerine bailanysty, iaǵni patsient aýrý juqtyrǵan adamdarmen bailanysta bolǵan kezde, sondai-aq dene qyzýy, qurǵaq jótel, intoksikatsiia, tynys alý jetkiliksizdiginiń belgileri siiaqty klinikalyq belgilerine qarai aiqyndalady», - dedi ol.
Onyń aitýynsha, bul ádis aýrýǵa qatysty ahýaldy durys boljam-bilýge, qajetti resýrstardy, meditsinalyq kadrlar men tósek oryndardy, meditsinalyq buiymdardy, dári-dármekti durys josparlap, statistikanyń ashyqtyǵyn qamtamasyz etýge múmkindik beredi.
