Sýret: Senat baspasóz qyzmeti
Naryq ústemdik etýge tiis salalarda memlekettiń shamadan tys aralasýy – jalpy ishki ónimdi eki esege ulǵaitý jónindegi mindetti oryndaýǵa kedergi bolatyn negizgi problemalardyń biri. Búgin Palata otyrysynda Senat Tóraǵasy Máýlen Áshimbaev osylai dedi, dep habarlaidy "Ult aqparat" Senattyń baspasóz qyzmetine silteme jasap.
Palata Tóraǵasy atap ótkendei, 2029 jylǵa qarai jalpy ishki ónimdi eki esege ulǵaitý – asa mańyzdy mindet. Is júzinde – bul Qazaqstannyń ekonomikasyn eki esege arttyrady. Alaida, qazirgi qalyptasqan jaǵdaida onyń júzege asýy qiyn. Senat Spikeri bul rette, eń aldymen, kvazimemlekettik sektordyń, onyń ishinde ekonomikadaǵy orasan zor sektordy basyp alǵan myńdaǵan tiimsiz kompaniialardyń úlesin qysqartý qajet ekenin aitty.
«Paradigmany ózgertý úshin Prezidentimiz Qasym-Jomart Kemeluly Toqaevtyń Jarlyǵy aiasynda belsendi ári maqsatqa sai áreket etý mańyzdy. Iaǵni, ekonomikamyzdy yryqtandyrý qajet. Eger qazir búkil kvazimemlekettik sektordyń úlesin kúrt qysqartpasaq, memleket olardy tiimdi basqara almaidy. Olar – «Samuryq-Qazyna» men «Báiterek» holdinginiń kóp bóligi. Budan basqa, ákimdikter men memlekettik organdarda sharýashylyq júrgizetin taǵy 6 myń memlekettik kompaniia bar. Kóptegen sektor boiynsha jekeshelendirý protsesi belsendi júrgizilmese, jalpy ishki ónimdi eki eselei almaimyz. Eki ekonomika bolýy kerek. Bizde bireýi bar. Ekinshisin qurý úshin jańa paradigmalyq tásilder qajet. Bul tek jekeshelendirý, jeke bastamalar, jańa investorlar tartý arqyly júzege asýy múmkin. Osy baǵytta depýtattar men Úkimet belsendi áreket etip, Memleket basshysynyń tapsyrmalaryn jedel oryndaidy dep úmittenemiz», – dedi Senat Tóraǵasy.
Aita keteiik, búgin Senat Spikeri Máýlen Áshimbaevtyń tóraǵalyǵymen Palata otyrysy ótti. Onda depýtattar Úkimettiń jáne Joǵary aýditorlyq palatanyń 2023 jylǵy respýblikalyq biýdjettiń atqarylýy týraly esepterin qarady.
