«Samuryq Qazyna» aqparat alańynda ótken brifingide «Qazaqstan temir joly» UK» AQ basqarma tóraǵasynyń orynbasary Oralhan Qulaqovqa kúzde kómirge qatysty qarbalas bolmaýy úshin qandai shara qabyldanyp jatqany jóninde saýal qoiyldy, dep habarlaidy QazAqparat.
«Bul jerde másele maýsymdyq tasymal týraly aitylyp otyrsa kerek. Ádette tamyzdyń aiaǵynan bastap kómir men astyq tasymaly 30-35, tipti keide 40 paiyzǵa deiin artady. Bul kezeńge biz de barynsha daiyndalamyz. Óz baiandamamda aitqanymdai, qolda bar jyljymaly quram el ishindegi tasymaldy ýaqtyly qamtamasyz etýge jetkilikti. Biraq tasymal jyl boiynda naqty belgilengen yrǵaqpen uiymdastyrylýy kerek. Úsh ailyq kólemdi bir aida jóneltse, árine, keptelis bolady. Al josparlap, sol boiynsha tasymaldansa, vagondar jetkilikti. Tasymaldyń naqty yrǵaqpen uiymdastyrylýy tieýshilerge ǵana emes qabyldap alýshylarǵa da qajet», - dedi QTJ ókili.
Onyń aitýynsha, búginde temirjol arqyly júk tasymaldaý naryǵynda barynsha ashyq júie qalyptasqan. «QTJ» monopoliiasy barynsha azaitylǵan.
«Men bul jerde tasymaldaýshy quramdy QTJ-nyki nemese jeke tasymaldaýshylar dep bólip otyrǵan joqpyn. Qolda bar vagondar parki dep bárin qosyp aityp otyrmyn. Bizdiń «Qaztemirtranstyń» ielegindegi jartylai ashyq vagonardyń úlesi búkil parktiń 40 paiyzyna da jetpeidi. Al jabyq vagondardyń jalpy quramdaǵy úlesi 40 paiyzdan sál asady. Iaǵni, naryqta barynsha ashyq júie qalyptasqan», - dedi ol.
