TMD elderi qarýly kúshteri shtabtarynyń bastyqtary 2025 jylǵa deiingi áskeri yntymaqtastyqty damytý jaiyn talqylady, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Qorǵanys ministriniń birinshi oryndasary - Qazaqstan Qarýly Kúshteri Bas shtabynyń bastyǵy general-leitenant Murat Bektanov Sankt-Peterbýrg qalasynda ótken TMD múshe elderdiń qarýly kúshteri shtab bastyqtary komitetiniń otyrysyna qatysty.
Otyrysta kópjaqty áskeri yntymaqtastyq máseleleri qaraldy. Qatysýshylar álemdegi áskeri-saiasi ahýal men onyń Dostastyq elderine áserin taldap, 2025 jylǵa deiingi Áskeri yntymaqtastyq tujyrymdamasyn júzege asyrý boiynsha sharalar legi talqylandy. Bul elderdiń keleshektegi ózara is-qimyl aiqyndaidy.
General-leitenant Murat Bektanov praktikalyq tájiribe almasýdyń, yntymaqtastyq negizinde áskeri saladaǵy ózara is-qimyldyń birlesken júielerdi damytýdyń mańyzyn atap ótti. Onyń ishinde áýe shabýylyna qarsy qorǵanystyń birikken júiesi, memlekettik radiolokatsiialyq tanýdyń biryńǵai júiesi, áskeri aviatsiianyń ushý qaýipsizdigi máseleleri boiynsha aqparat almasý júiesi sekildi máseleler bar. Bul rette oqý-jattyǵý aǵymdaǵy jyldyń qyrkúiek aiynda Qazaqstan men Reseidiń áskeri poligondarynda ótetini belgili boldy.
«Jaýyngerlik baýyrlastyq 2021» birlesken oqý-jattyǵýyn talqylaý barysynda qazaqstandyq tarap búgingi kúni TMD áýe shabýylyna qarsy qorǵanystyń birlesken júiesi – áskeri yntymaqtastyq aiasynda integratsiialyq protsestiń eń mańyzdy jetistikteriniń biri ekenin atap ótti.
Talqylaýǵa arqaý bolǵan taqyryptardyń biri radiatsiialyq, himiialyq jáne biologiialyq qorǵaý áskerleriniń COVID-19 taralýyna qarsy kúreske qatysý tájiribesi. Qazaqstanda bul bólimsheler áleýmettik mańyzy bar jáne karantindik obektilerdi, adamdar kóp jinalatyn oryndardy, blokpostardy, Qarýly Kúshter obektilerin, qalalardyń jáne memlekettik ákimshilik obektilerdiń tynys-tirshiligin qamtamasyz etýdi, jaiaý júrginshiler aimaqtary men jol ýchaskelerin óńdeý úshin qoldanyldy.
Budan bólek, qatysýshylar 2022 jylǵa josparlanǵan birlesken is-sharalardy, áýe-ǵaryshtyq qorǵanys júiesin qurý salasyndaǵy zertteýlerdi jáne aviatsiianyń ushý qaýipsizdiginiń jai-kúiin talqylady.
TMD normativtik quqyqtyq bazasyn jetildirý mańyzdy máseleniń biri bolyp qala beredi. Qazaqstanda TMD-ǵa qatysýshy memleketter qarýly kúshteriniń birlesken (birikken) bailanys júiesi týraly kelisimdi ratifikatsiialaý týraly zań jobasy jaqyn arada Qazaqstan Parlamentiniń qaraýyna engiziletin bolady. Atalǵan zańnyń kúshine enýi olardy jańǵyrtý negizinde áskeri bailanys júielerin, keshenderi men quraldaryn neǵurlym tiimdi damytýǵa, úilesimdiligin qamtamasyz etýge múmkindik beredi.
Otyrys barysynda qabyldanǵan sheshimder TMD-ǵa qatysýshy memleketterdiń jalpy jáne ulttyq múddelerin eskere otyryp, kópjaqty áskeri yntymaqtastyq júiesin damytýǵa baǵyttalǵanyn atap ótken jón.
