Marqum bolǵan órt sóndirýshi Asqar Zabikýlin men zardap shekken Aian Kempirovtiń otbasyna ipoteka men nesie qaryzdaryn óteýge kómek kórsetildi, - dep habarlaidy Massaget.kz agenttigi.
Astana ákimdigi qaza bolǵan qutqarýshy Asqar Zabikýlinniń týǵan-týystary men jaqyndaryna kóńil aitty.
"Asqardyń artynda eki kishkentai balasy qaldy. Ózderińiz biletindei, Asqar Zabikýlinniń jubaiyna úsh bólmeli páterdiń sertifikaty tapsyryldy. Jańa baspana Esil aýdanyndaǵy jańa turǵyn úi kesheninde ornalasqan. Bul páter Asqardyń otbasyna jekemenshikke, árlengen kúide ári jihazymen birge beriledi. Qazir qujattaryn rásimdeý jumysy júrip jatyr.
Al qutqarýshy Aian Kempirovtiń otbasyna kómek retinde ipotekasy jabyldy. Onyń somasy 24 million teńgeni quraidy. Sol siiaqty Asqar Zabikýlin men Aian Kempirovtiń otbasylaryna tiesili 6 million teńgeniń nesiesi óteldi", - dep málimdedi Aqmaral Oljabaeva.
Eske salaiyq, Astanadaǵy turǵyn úi keshenindegi órt kezinde úsh adamdy qutqarǵan Asqar Zabikýlinge buǵan deiin Memleket basshysynyń atynan QR TJ ministri Iýrii Ilin men elorda ákimi Altai Kólginov úsh bólmeli páterdiń sertifikatyn tabystaǵan bolatyn.
Ol 20 qarashada dúnieden ozdy. Dárigerler onyń ómirin saqtap qalý úshin qansha tyrysqanymen, demi aýrýhanada úzildi.
