Qurylysy 12 jylǵa sozylǵan Esqula sý qubyry biyl paidalanýǵa beriledi. Bul týraly búgin Úkimet otyrysynda Ekologiia, geologiia jáne tabiǵi resýrstar ministri Serikqali Brekeshev aitty, dep habarlaidy QazAqparat.
«Halyqty sapaly aýyz sýmen qamtamasyz etý – ministrliktiń basym mindetteriniń biri. Sý kodeksine sáikes, ministrlik eldi mekenderdiń shekarasyna deiin sýmen jabdyqtaý jónindegi fýnktsiialardy júzege asyrady jáne toptyq sý qubyrlaryn salý, rekonstrýktsiialaý jónindegi biýdjettik baǵdarlamanyń ákimshisi», - dedi ol.
Ministrdiń dereginshe, qazirgi ýaqytta respýblika boiynsha uzyndyǵy 15,5 myń shaqyrym 76 toptyq sý qubyry bar. Onyń ishinde 13,4 myń shaqyrymdy quraityn 39 toptyq sý qubyry respýblikalyq menshikte. Olar 1,4 mln adam sany bar 655 aýyldyq eldi mekendi sýmen qamtamasyz etýde. Byltyr Aqmola, Qaraǵandy jáne Soltústik Qazaqstan oblystarynda sý qubyrlaryn salý jáne rekonstrýktsiialaý jónindegi 5 nysan paidalanýǵa berildi. Sondai-aq testilik rejimde Aqtóbe, Qaraǵandy jáne Qyzylorda oblystaryndaǵy 3 nysanda sapaly aýyz sý berildi. Nátijesinde 800 shaqyrym jeli salyndy. Jalpy 5,8 myń adam turatyn 5 aýyldyq eldi meken sapaly aýyz sýǵa qol jetkizdi jáne 203 myń halqy bar 51 aýyldyq eldi meken men 3 qalada sýmen jabdyqtaý jaqsartyldy.
«Biyl 2010 jyly bastalǵan Esqula sý qubyryn paidalanýǵa berý josparlanǵan. Sonymen qatar, Almaty, Atyraý, Qaraǵandy, Qyzylorda, Mańǵystaý jáne Soltústik Qazaqstan oblystarynda toptyq sý qubyrlaryn salý jáne rekonstrýktsiialaý boiynsha 18 nysandy iske asyrýǵa 6,1 mlrd teńge kóleminde qarajat bólindi. Aiaqtalý merzimi - 2023-2024 jyldar. Nátijesinde jalpy sany 458 myń adamdy quraityn 158 aýyldyq eldi mekende sýmen jabdyqtaý jaqsartylady», - dedi Serikqali Brekeshev.
