Qazaqstannyń Qurylysshylar odaǵynyń ókilderi baspana satýdaǵy ózekti máselelerdi atady, dep habarlaidy QazAqparat.
«Elimizde baspana jetispeýshiliginiń ózekti másele bolyp otyrǵany barshaǵa aian. Baspananyń qymbat bolýynan halyqtyń úi alýǵa qarajaty jetpeidi. Memleket «7-20-25», «Nurly jer», «Baqytty otbasy» syndy baǵdarlamalar ázirledi. Biraq, bul baǵdarlamalar halyqtyń muqtaj bóligin qamtamasyz etýge baǵyttalǵan. Atalǵan sanatqa kirmeitin turǵyndar baspana alýda qinalady», - dedi Qazaqstannyń Qurylysshylar odaǵy Saraptama bóliminiń basshysy Ásem Núkenova elordada ótken jiynda.
Sonymen birge, Odaq ókili baspananyń qymbattap, halyqtyń satyp alý qabiletiniń tómendep bara jatqanyn jetkizdi.
«Injenerlik infraqurylym men úilerdiń ishki abattanýy boiynsha mindettemeler qurylysshyǵa berilgen. Odan bólek, kólik turaqtaryn salý da baspananyń qymbattaýyna yqpal etedi. Al memleket, iaǵni Qurylys isteri komiteti úi salýshynyń qurylys materialdaryn otandyq óndirýshilerden alýyn talap etip otyr. Importtyq taýarlardyń baǵasy da arzan, sapasy da jaqsyraq ekeni belgili. Onsyz da halyqtyń tólem qabileti jyldan-jylǵa tómendep keledi. Saldarynan, halyqtyń baspana degen suranysyn ótei almaimyz», - dedi Á. Núkenova.
Onyń aitýynsha, qurylys salasyndaǵy memlekettik-jekeshelik áriptestikti arttyrý máseleni sheshýge kómektesedi.
«Ázirge áleýmettik baǵdarlamalar aiasynda memlekettik-jekeshelik áriptestik bar. Eger memleketti barlyq qurylys salasyna qosar bolsaq, baspana baǵasy arzandap, halyqtyń satyp alý tólemi artar edi. Úi salýshylar alypsatardyń aralasýynsyz-aq qurylys materialdaryn satyp alýy úshin biryńǵai onlain-resýrs qurýdy usynamyz. Úi salý kombinattaryna turaqty júkteme berip, qoljetimdi baspana qurylysy boiynsha uzaq merzimdi kelisimshart bekitýge bolady. Odan bólek, Qurylys isteri komiteti úi salýshylardy tek qana otandyq materialdardy satyp alýyn mindetteitin zań jobasyn ázirlep jatyr. Olardyń materialy qymbat bolǵandyqtan, Qurylysshylar odaǵy memlekettik-jekeshelik áriptestik aiasynda memlekettiń qurylys materialdyn satyp alýǵa 20-30% mólsherde sýbsidiia bólgenin qalaidy», - dedi Ásem Núkenova.
