QR Qarjy ministri Erulan Jamaýbaev qurylys salasyndaǵy memlekettik satyp alýdy jetildirý usynystaryn aitty, dep habarlaidy QazAqparat.
«Qurylys jumystaryn oryndaý úshin jetkilikti materialdyq resýrstary bar merdigerlerdi irikteý maqsatynda menshikti qurylys tehnikasynyń bolýy týraly mindetti talap belgileý usynylady. Ol úshin mamandandyrylǵan tehnikanyń biryńǵai bazasyn qurý josparlanýda. Bul olardyń bar-joǵyn avtomatty túrde tekserýge múmkindik beredi», - dedi ministr Úkimet úiinde ótken baspasóz máslihatynda.
Ministrdiń aitýynsha, mundai sharalar qurylys jumystaryn oryndaý úshin bazalyq tehnikasy joq merdigerlerdi irikteýden ótkizbeidi.
«Budan basqa, memlekettik satyp alýda jáne kvazimemlekettik sektor sýbektileriniń satyp alýynda qurylys jumystaryn qosalqy merdigerlikke zańsyz berýdi shekteý maqsatynda qosalqy merdigerlerge jumystar shekti kóleminen asqan kezde jáne tapsyrys berýshimen kelisilmegen qosalqy merdigerlerdi tartý kezinde Satyp alý týraly shartty buzý múmkindigi qarastyrylady», - dedi Jamaýbaev.
