Senattyń jalpy otyrysynda depýtat Bekbolat Orynbekov elimizdegi qurylys sapasyna qatysty problemany kóterdi, dep habarlaidy QazAqparat.
Onyń paiymynsha, ǵimarattar qurylysynyń sapasyna memlekettik baqylaýdyń azaiýy kásipkerliktiń damýyna oń áser etkenimen, salynǵan úilerdiń qulaýyna ákep soǵýy yqtimal.
«Keiingi 7-8 jylda biznes-klimatty jaqsartyp, kásipkerlik qyzmetti retteý maqsatynda tekserý organdarynyń bul salaǵa aralasýy azaidy. Baqylaý talaptarynyń álsireýiniń teris saldaryna toqtalsaq, Pavlodar qalasynda salynyp jatqan turǵyn úi qulap, sheteldik jumysshylar zardap shekti. Apatqa sapasyz jobalaý jáne negizgi talaptardy saqtamai júrgizilgen qurylys jumystary, sondai-aq tehnikalyq qadaǵalaýdyń álsizdigi sebep boldy. Quzyrly organ nysanǵa ýaqtyly inspektsiia júrgizgende, osyndai kemshilikterge jol berilmes. Alaida qoldanystaǵy zańnamanyń talaptary qurylys barysyn tekserýdi júzege asyrý qadamdaryn shektedi», - dedi senator Úkimet basshysynyń atyna joldaǵan saýalynda.
Depýtat qurylys inspektorlarynyń jumys aýqymynyń kóptigi máselesine de nazar aýdardy. Qazirgi kezde olardyń sany 138 bolsa, salynyp jatqan nysandardyń sany 8 myńǵa jýyq.
Senator kez kelgen ǵimaratty nemese qurylysty odan ári paidalaný kezinde adamdardyń qaýipsizdigin qamtamasyz etýdiń mańyzyn eskere otyryp, memlekettik sáýlet jáne qurylysty baqylaý salasy boiynsha qoldanystaǵy zańnamaǵa birqatar naqty ózgerister engizýdi usyndy.
Budan buryn habarlanǵandai, 2021 jyldyń maýsym aiynda Pavlodarda qurylys júrip jatqan úi qulaǵan edi. Ǵimarat qulaǵan kezde úsh jumysshy zardap shekti, olardyń barlyǵy - Ózbekstan azamattary.
