Biyl qańtardan sáýirge deiingi satý-satyp alý operatsiialarynyń sany ótken jyldyń sáikes kezeńimen salystyrǵanda 2,5 esege ósti. Bul týraly QR Básekelestikti qorǵaý jáne damytý agenttigi «QazAqparat» HAA alańynda ótkizgen bastapqy turǵyn úi naryǵyndaǵy básekelestik týraly Open Space-te aityldy, dep habarlaidy QazAqparat.
«Turǵyn úi baǵasynyń jaǵdaiy turaqty emes jáne qubylmaly bolýymen erekshelenedi. 2021 jyldyń qańtar-sáýir ailarynda bastapqy turǵyn úi baǵalarynyń ósýi 5,5% qurady. Ótken jyldyń sáikes kezeńimen salystyrǵanda ol 1,5%-dy ǵana qurady. Biylǵy ekinshi deńgeili turǵyn úidiń baǵasy ósip keledi, iaǵni 12,3% ósti, 2020 jyldyń osy kezeńinde 2,2% bolǵan», - deidi QR Básekelestikti qorǵaý jáne damytý agenttiginiń tóraǵasy Serik Jumanǵarin.
Onyń aitýynsha, biyl qańtardan sáýirge deiingi satý-satyp alý operatsiialarynyń sany ótken jyldyń sáikes kezeńimen salystyrǵanda 2,5 esege ósip, 175 040-qa jetti.
«Memleket basshysy qabyldaǵan sońǵy sharalar men qurylys materialdarynyń qymbattaýy turǵyn úi naryǵyna áserin tigizýde», - deidi ol.
